شب ہجراں میں دم نکلتا ہے — میر کلو عرش

Arooz is now on the App Store, for iPhone and iPad. Download →

میر کلو عرش

شب ہجراں میں دم نکلتا ہے

کب پیام وصال ٹلتا ہے

دل بیمار سے ہے تنگ مسیح

داغ سے آفتاب جلتا ہے

بے زری سے ہوں پائمال بتاں

زور کس کا خدا سے چلتا ہے

دل نہ لے اے صنم برائے خدا

اس سے کچھ جی مرا بہلتا ہے

آتش عشق زلف پیچاں ہے

ہڈیوں سے دھواں نکلتا ہے

تیرے ہنسنے پہ میں جو روتا ہوں

ابر مانند برق جلتا ہے

تجھ سے اے اشک ماہ فرقت ہو

رنگ کیا کیا فلک بدلتا ہے

اپنے بیمار کو نہ پوچھ مسیح

اب کوئی دم میں دم نکلتا ہے

داغ کا جسم زار سے ہے فروغ

خس سے جیسے چراغ جلتا ہے

سرد یا عرش پائے قاتل پر

لاش پر وہ بھی ہاتھ ملتا ہے