شب کو پھرے وہ رشک ماہ خانہ بہ خانہ کو بہ کو

شب کو پھرے وہ رشک ماہ خانہ بہ خانہ کو بہ کو

دن کو پھروں میں داد خواہ خانہ بہ خانہ کو بہ کو

قبلہ نہ سرکشی کرو حسن پہ اپنے اس قدر

تم سے بہت ہیں کج کلاہ خانہ بہ خانہ کو بہ کو

خانہ خراب عشق نے کھو کے مری حیا و شرم

مجھ کو کیا ذلیل آہ خانہ بہ خانہ کو بہ کو

تو نے جو کچھ کہ کی جفا تا دم قتل میں سہی

میری وفا کے ہیں گواہ خانہ بہ خانہ کو بہ کو

تیری کمند زلف کے ملک بہ ملک ہیں اسیر

بسمل خنجر نگاہ خانہ بہ خانہ کو بہ کو

کل تو نے کس کا خوں کیا مجھ کو بتا کہ آج ہے

شور و فغاں و آہ آہ خانہ بہ خانہ کو بہ کو

مجھ کو بلا کے قتل کر یا تو مرے گناہ بخش

ہوں میں کہاں تلک تباہ خانہ بہ خانہ کو بہ کو

سینہ فگار و جامہ چاک گریہ کناں و نعرہ زن

پھرتے ہیں تیرے داد خواہ خانہ بہ خانہ کو بہ کو

تاباںؔ ترے فراق میں سر کو پٹکتا رات دن

پھرتا ہے مثل مہر و ماہ خانہ بہ خانہ کو بہ کو

shab ko phire wo rashk-e-mah khana ba khana ku ba ku

din ko phiron mein dad khwah khana ba khana ku ba ku

qibla na sarkashi karo husn pe apne is qadar

tum se bahut hain kaj kulah khana ba khana ku ba ku

khana kharab ishq ne kho ke miri haya-o-sharm

mujh ko kiya zalil ah khana ba khana ku ba ku

tu ne jo kuchh ke ki jafa ta dam-e-qatl mein sahi

meri wafa ke hain gawah khana ba khana ku ba ku

teri kamand-e-zulf ke mulk ba mulk hain asir

bismil khanjar nigah khana ba khana ku ba ku

kal tu ne kis ka khun kiya mujh ko bata ke aj hai

shor-o-fughan-o-ah ah khana ba khana ku ba ku

mujh ko bala ke qatl kar ya to mire gunah bakhsh

hun main kahan talak tabah khana ba khana ku ba ku

sina figar-o-jama chak girya kunan-o-naara zan

phirte hain tere dad khwah khana ba khana ku ba ku

taban tire firaq mein sar ko patakta rat din

phirta hai misl-e-mehr-o-mah khana ba khana ku ba ku