شب فرقت میں یار جانی کی

شب فرقت میں یار جانی کی

درد پہلو نے مہربانی کی

منہ دکھاؤ بہت رہی تکرار

ارنی اور لن ترانی کی

جس کو کہتے ہیں چودھویں کا چاند

تیری تصویر ہے جوانی کی

کمر یار ہو گئی غائب

سن کے دھوم اپنی ناتوانی کی

صورت حال پر ہمارے مہر

داغ نے زخم نے نشانی کی

سیر نعمت سے دو جہان کی کیا

دے کے شبنم کو بوند پانی کی

ہو گیا عشق حسن سے ناگاہ

پوچھتے کیا ہو ناگہانی کی

دل برشتہ ہوا جو مثل کباب

میں نے ترکوں کی مہمانی کی

لب جاں بخش کے قریب وہ خط

شرح ہے متن زندگانی کی

گوش زد ہوتے ہی ہوئی دشمن

نیند تیری مری کہانی کی

کھینچتے اس غزال کی صورت

چوکڑی بھولتی ہے مانیؔ کی

مجھ کو بٹھلا کے یار سوتا ہے

عاشقی کی کہ پاسبانی کی

رہ گیا شوق منزل مقصود

پائے خفتہ نے سرگرانی کی

مثل شبنم ہوں صاف دل قانع

مجھ کو دریا ہے بوند پانی کی

برق چمکی تو سرفراز کیا

ابر آیا تو مہربانی کی

راحت مرگ کو نہ پوچھ آتشؔ

نہ رہی قدر زندگانی کی

shab-e-furqat mein yar jani ki

dard-e-pahlu ne mehrbani ki

munh dikhao bahut rahi takrar

arini aur lan tarani ki

jis ko kahte hain chaudhwin ka chand

teri taswir hai jawani ki

kamar-e-yar ho gai ghaib

sun ke dhum apni natawani ki

surat-e-hal par hamare mehr

dagh ne zakhm ne nishani ki

sair nemat se do jahan ki kya

de ke shabnam ko bund pani ki

ho gaya ishq-e-husn se nagah

puchhte kya ho nagahani ki

dil birishta hua jo misl-e-kabab

main ne tarkon ki mehmani ki

lab-e-jan bakhsh ke qarib wo khat

sharh hai matn zindagani ki

gosh zad hote hi hui dushman

nind teri miri kahani ki

khinchte is ghazal ki surat

chaukari bhulti hai mani ki

mujh ko bithla ke yar sota hai

ashiqi ki ke pasbani ki

rah gaya shauq manzil-e-maqsud

pae khufta ne sargirani ki

misl-e-shabnam hun saf dil qane

mujh ko dariya hai bund pani ki

barq chamki to sarfaraz kiya

abr aya to mehrbani ki

rahat-e-marg ko na puchh atish

na rahi qadr zindagani ki