سنا ہم کو آتے جو اندر سے باہر

سنا ہم کو آتے جو اندر سے باہر

پھرے الٹے پیروں باہر سے باہر

کڑی میں نہ دے ساتھ یار دلی تک

شرر چوٹ کھا کر ہو پتھر سے باہر

یوں ہی کالعدم ہم میان لحد تھے

مٹایا نشاں اس پہ ٹھوکر سے باہر

نہ کر ہرزہ گردی جو ذی آبرو ہے

نکلتا نہیں آئنہ گھر سے باہر

جناں سے ہوئی مدت آدم کو نکلے

وطن سے ہوں میں زندگی بھر سے باہر

وہ محروم دولت ہوں برگشتہ قسمت

اڑے خاک گھر میں جو ہو برسے باہر

مٹے گردش بخت کیا لاغروں کی

نہ ہو کاہ گرداب چکر سے باہر

لڑاتے جو ہو شادؔ سے گھر میں آنکھیں

نظر ڈالو ہم پر بھی تیور سے باہر

suna ham ko ate jo andar se bahar

phire ulte pairon bahar se bahar

kari mein na de sath yar-e-dili tak

sharar chot kha kar ho patthar se bahar

yun hi kaladam ham miyan lahad the

mitaya nishan us pe thokar se bahar

na kar harza gardi jo zi abru hai

nikalta nahin aina ghar se bahar

janan se hui muddat adam ko nikle

watan se hun main zindagi bhar se bahar

wo mahrum daulat hun bargashta qismat

ure khak ghar mein jo ho barse bahar

mite gardish-e-bakht kya lagharon ki

na ho kah girdab chakkar se bahar

larate jo ho shad se ghar mein ankhen

nazar dalo ham par bhi tewar se bahar