سناؤں تمہیں زندگی کی کہانی

سناؤں تمہیں زندگی کی کہانی

غم جاودانی غم جاودانی

نہ سمجھا وہ اسرار ہستی نہ سمجھا

یہاں جس نے غم کی حقیقت نہ جانی

محبت میں اک درس عبرت بنے گی

مری نا مرادی مری سخت جانی

محبت کی دنیا لٹی جا رہی ہے

جوانی اور اس پر کسی کی جوانی

تصور میں ہیں عہد ماضی کی باتیں

نہ وہ سر خوشی ہے نہ وہ سرگرانی

نہ جانے کہاں تک یہ دنیا سنے گی

کسی کا فسانہ کسی کی زبانی

مجھے ہوشؔ یہ درس غم نے دیا ہے

کہ ہستی کا دھوکا ہے اک شادمانی

sunaun tumhen zindagi ki kahani

gham-e-jawidani gham-e-jawidani

na samjha wo asrar-e-hasti na samjha

yahan jis ne gham ki haqiqat na jani

mohabbat mein ik dars-e-ibrat banegi

miri na muradi miri sakht jani

mohabbat ki duniya luti ja rahi hai

jawani aur us par kisi ki jawani

tasawwur mein hain ahd-e-mazi ki baten

na wo sar khushi hai na wo sargirani

na jane kahan tak ye duniya sunegi

kisi ka fasana kisi ki zabani

mujhe hosh ye dars-e-gham ne diya hai

ke hasti ka dhoka hai ik shadmani