سنا ہے زخمی تیغ نگہ کا دم نکلتا ہے — حیرت الہ آبادی

Arooz is now on the App Store, for iPhone and iPad. Download →

حیرت الہ آبادی

سنا ہے زخمی تیغ نگہ کا دم نکلتا ہے

ترا ارمان لے اے قاتل عالم نکلتا ہے

نہ آنکھوں میں مروت ہے نہ جائے رحم ہے دل میں

جہاں میں بے وفا معشوق تم سا کم نکلتا ہے

کہا عاشق سے واقف ہو تو فرمایا نہیں واقف

مگر ہاں اس طرف سے ایک نامحرم نکلتا ہے

محبت اٹھ گئی سارے زمانے سے مگر اب تک

ہمارے دوستوں میں باوفا اک غم نکلتا ہے

پتا قاصد یہ رکھنا یاد اس قاتل کے کوچے سے

کوئی نالاں کوئی بسمل کوئی بے دم نکلتا ہے