سمجھ گھر یار کا میں شہ نشین دل کو دھوتا ہوں

سمجھ گھر یار کا میں شہ نشین دل کو دھوتا ہوں

کہیں ہیں لوگ دیوانے کہ دیوانہ ہوں روتا ہوں

بجھائے اشک یہ خوں کے جو فوارے اچھلتے ہیں

مژہ سے یار کے لے نشتر آنکھوں میں چبھوتا ہوں

مدد اے خضر گریہ غرق کریو ناؤ دل آج ہی

یہ ہے ڈبوانے والا میں اسے پہلے ڈبوتا ہوں

بت سنگین دل کی دیکھ تصویر آنکھیں پتھرائیں

ٹھٹک ہوں نقش قالیں سا نہ روتا ہوں نہ سوتا ہوں

میں کوئے میکشان و مہوشاں کے متصل پہنچا

خبردار اے حریفو اب حواس و ہوش کھوتا ہوں

مبادا میرے گل رو کا گل رخسار مرجھاوے

پھوار اے اظفریؔ دے آنسوؤں کی میں بھگوتا ہوں

samajh ghar yar ka main shah nashin-e-dil ko dhota hun

kahin hain log diwane ke diwana hun rota hun

bujhae ashk ye khun ke jo faware uchhalte hain

mizha se yar ke le nashtar ankhon mein chubhota hun

madad ai khizr girya gharq kariyo nao dil aj hi

ye hai duboane wala mein use pahle dubota hun

but-e-sangin dil ki dekh taswir ankhen pathraen

thitak hun naqsh-e-qalin sa na rota hun na sota hun

main ku-e-maikashan-o-mahwashan ke muttasil pahuncha

khabardar ai harifo ab hawas-o-hosh khota hun

mabada mere gul ru ka gul rukhsar murjhawe

phuar ai azfari de ansuon ki main bhigota hun