سن کے میرے عشق کی روداد کو

سن کے میرے عشق کی روداد کو

لوگ بھولے قیس کو فرہاد کو

اے نگاہ یاس ہو تیرا برا

تو نے تڑپا ہی دیا جلاد کو

بعد میرے اٹھ گئی قدر ستم

اب ترستے ہیں حسیں بیداد کو

اک ذرا جھوٹی تسلی ہی سہی

کچھ تو سمجھا دو دل ناشاد کو

ہائے یہ درد جگر کس سے کہوں

کون سنتا ہے مری فریاد کو

جائیں گے دنیا سے سب کچھ چھوڑ کر

ہاں مگر لے کر کسی کی یاد کو

اب مجھے مانیں نہ مانیں اے حفیظؔ

مانتے ہیں سب مرے استاد کو

sun ke mere ishq ki rudad ko

log bhule qais ko farhad ko

ai nigah-e-yas ho tera bura

tu ne tarpa hi diya jallad ko

baad mere uth gai qadar-e-sitam

ab taraste hain hasin bedad ko

ik zara jhuti tasalli hi sahi

kuchh to samjha do dil-e-nashad ko

hae ye dard-e-jigar kis se kahun

kaun sunta hai miri fariyad ko

jaenge duniya se sab kuchh chhor kar

han magar le kar kisi ki yad ko

ab mujhe manen na manen ai hafiz

mante hain sab mire ustad ko