سمجھنا فہم گر کچھ ہے طبیعی سے الٰہی کو

سمجھنا فہم گر کچھ ہے طبیعی سے الٰہی کو

شہادت غیب کی خاطر تو حاضر ہے گواہی کو

نہیں ممکن کہ ہم سے ظلمت امکان زائل ہو

چھڑا دے آہ کوئی کیوں کے زنگی سے سیاہی کو

عجب عالم ہے ایدھر سے ہمیں ہستی ستاتی ہے

ادھر سے نیستی آتی ہے دوڑی عذر خواہی کو

نہ رہ جاوے کہیں تو زاہدا محروم رحمت سے

گنہ گاروں میں سمجھا کریو اپنی بے گناہی کو

نہ لازم نیستی اس کو نہ ہستی ہی ضروری ہے

بیاں کیا کیجیے اے دردؔ ممکن کی نناہی کو

samajhna fahm gar kuchh hai tabii se ilahi ko

shahadat ghaib ki khatir to hazir hai gawahi ko

nahin mumkin ke ham se zulmat-e-imkan zail ho

chhura de ah koi kyun ke zangi se siyahi ko

ajab alam hai idhar se hamen hasti satati hai

idhar se nisti ati hai dauri uzr khwahi ko

na rah jawe kahin to zahda mahrum-e-rahmat se

gunah garon mein samjha kariyo apni be gunahi ko

na lazim nisti us ko na hasti hi zaruri hai

bayan kya kijiye ai dard mumkin ki nannahi ko