سنبلِ تر ہے پریشاں زلفِ اکبر دیکھ کر

سنبلِ تر ہے پریشاں زلفِ اکبر دیکھ کر

کٹ گیا ہے ماہِ تاباں روئے انور دیکھ کر

آب ہو جائے گا حُسنِ روئے اکبر دیکھ کر

سامنے آئینہ لانا، اے سکندر دیکھ کر

جب چلی اعدا پہ تیغِ شہ، پکارے جبرئیل

یا حُسین ابنِ علی! خادم کے شہپر دیکھ کر

حشر تھا اہلِ حرم میں وقتِ قتلِ شاہِ دیں

روتے تھے دشمن بھی شہ کو زیرِ خنجر دیکھ کر

خم ہوئی شہ کی کمر، ہاتھوں کی طاقت گھٹ گئی

دونوں شانوں سے قلم، دستِ برادر دیکھ کر

کی رسائی بختِ حُر نے جب، تو پہنچا شہ کے پاس

آ گیا خود راہ پر جنت کا رہبر دیکھ کر

جب جھپٹ کر بابِ خیبر کو اکھاڑا آپ نے

ہو گئے کفار ششدر، زورِ حیدر دیکھ کر

کربلا کے بَن میں جا پہنچے جو شاہِ بحر و بر

خوش ہوئے مقتل کو سب انصار و یاور دیکھ کر

مسکرائے دیکھ کر صحرا کو ہم شکلِ نبی

تن گئے دریا کو عباسِ دلاور دیکھ کر

ہو چکیں جس وقت مُہریں فردِ قتلِ شاہ پر

رو دیے خود شاہ اپنے خوں کا محضر دیکھ کر

خاک پر بے دم پڑے ہیں سب عزیز و اقربا

روتے ہیں شبیر لاشوں کو برابر دیکھ کر

کہتے تھے یہ حلق ہے نانا کا میرے حلق پر

پھیرنا شمشیر او شمرِ ستمگر دیکھ کر

خلد میں یاد آئی جب عباس کو بچوں کی پیاس

رو دیا وہ با وفا بھی سوئے کوثر دیکھ کر

پیشِ خالق سب ہیں یکساں، رشک او غافل نہ کر

آپ کو کم دیکھ کر، اوروں کو برتر دیکھ کر

آسماں پر شرم سے برقِ درخشاں چھپ گئی

ذوالفقارِ حیدرِ صفدر کے جوہر دیکھ کر

صُرّۂ خاکِ شفا سے یوں کھِلا تربت میں دل

جس طرح بلبل ہو بالیدہ گُلِ تر دیکھ کر

کربلا کو ہند سے جاتے اگر ہم اے انیس

شاد ہو جاتے وہ صحرائے منور دیکھ کر

sumbul-e-tar hai pareshan zulf-e-akbar dekh kar

kat gaya hai mah-e-taban ru-e-anwar dekh kar

ab ho jaega husn-e-ru-e-akbar dekh kar

samne aina lana, ai sikandar dekh kar

jab chali aada pe tegh-e-shah, pukare jibrail

ya husen ibn-e-ali! khadim ke shahpar dekh kar

hashr tha ahl-e-haram mein waqt-e-qatl-e-shah-e-din

rote the dushman bhi shah ko zer-e-khanjar dekh kar

kham hui shah ki kamar, hathon ki taqat ghut gai

donon shanon se qalam, dast-e-baradar dekh kar

ki rasai bakht-e-hur ne jab, to pahuncha shah ke pas

a gaya khud rah par jannat ka rahbar dekh kar

jab jhapat kar bab-e-khaibar ko ukhara ap ne

ho gae kuffar shashdar, zor-e-haidar dekh kar

karbala ke ban mein ja pahunche jo shah-e-bahr-o-bar

khush hue maqtal ko sab ansar-o-yawar dekh kar

muskurae dekh kar sahra ko ham shakl-e-nabi

tan gae dariya ko abbas-e-dilawar dekh kar

ho chuken jis waqt mohrin fard-e-qatl-e-shah par

ro diye khud shah apne khun ka mahzar dekh kar

khak par be dam pare hain sab aziz-o-aqriba

rote hain shabbir lashon ko barabar dekh kar

kahte the ye halq hai nana ka mere halq par

pherna shamshir o shimr-e-sitamgar dekh kar

khuld mein yad ai jab abbas ko bachchon ki pyas

ro diya wo ba wafa bhi su-e-kausar dekh kar

pesh-e-khaliq sab hain yaksan, rashk-e-o ghafil na kar

ap ko kam dekh kar, auron ko bartar dekh kar

asman par sharm se barq-e-darakhshan chhup gai

zualfaqar-e-haidar-e-safdar ke jauhar dekh kar

surra-e-khak-e-shifa se yun khila turbat mein dil

jis tarah bulbul ho balida gul-e-tar dekh kar

karbala ko hind se jate agar ham ai anis

shad ho jate wo sahra-e-munawwar dekh kar