زبانوں پر نہیں اب طور کا فسانہ برسوں سے
اقبال سہیلزبانوں پر نہیں اب طور کا فسانہ برسوں سے
تجلی گاہ ایمن ہے دل دیوانہ برسوں سے
کچھ ایسا ہے فریب نرگس مستانہ برسوں سے
کہ سب بھولے ہوئے ہیں کعبہ و بت خانہ برسوں سے
وہ چشم فتنہ گر ہے ساقئ مے خانہ برسوں سے
کہ باہم لڑ رہے ہیں شیشہ و پیمانہ برسوں سے
نہ اب منصور باقی ہے نہ وہ دار و رسن لیکن
فضا میں گونجتا ہے نعرۂ مستانہ برسوں سے
چمن کے نونہال اس خاک میں پھولیں پھلیں کیونکر
یہاں چھایا ہوا ہے سبزۂ بیگانہ برسوں سے
یہ آنکھیں مدتوں سے خوگر برق تجلی ہیں
نشیمن بجلیوں کا ہے مرا کاشانہ برسوں سے
ترے قرباں ادھر بھی ایک جھونکا ابر رحمت کا
جبینوں میں گرہ ہے سجدۂ شکرانہ برسوں سے
سہیلؔ اب کس کو سجدہ کیجئے حیرت کا عالم ہے
جبیں خود بن گئی سنگ در جانانہ برسوں سے
zabanon par nahin ab tur ka fasana barson se
tajalli gah-e-eman hai dil-e-diwana barson se
kuchh aisa hai fareb-e-nargis-e-mastana barson se
ke sab bhule hue hain kaaba-o-but khana barson se
wo chashm-e-fitna gar hai saqi-e-mai khana barson se
ke baham lar rahe hain shisha-o-paimana barson se
na ab mansur baqi hai na wo dar-o-rasan lekin
faza mein gunjta hai naara-e-mastana barson se
chaman ke naunihal is khak mein phulen phalen kyunkar
yahan chhaya hua hai sabza-e-begana barson se
ye ankhen muddaton se khugar-e-barq-e-tajalli hain
nasheman bijliyon ka hai mira kashana barson se
tire qurban idhar bhi ek jhonka abr-e-rahmat ka
jabinon mein girah hai sajda-e-shukrana barson se
sahel ab kis ko sajda kijiye hairat ka alam hai
jabin khud ban gai sang-e-dar-e-janana barson se