زلفیں چھوڑیں ہیں کہ جوڑا اس نے چھوڑا سانپ کا

زلفیں چھوڑیں ہیں کہ جوڑا اس نے چھوڑا سانپ کا

دیکھیے کس کس کو ڈستا ہے یہ جوڑا سانپ کا

گورے گالوں پر ترے زلفیں یہ لہراتی نہیں

یاسمیں زار صباحت میں ہے جوڑا سانپ کا

عشق ان زلفوں کا مجھ سے ترک ہونے کا نہیں

ہے مرا ہم زاد اے ناصح یہ جوڑا سانپ کا

دونوں زلفیں یار کی الٹی ہیں بالوں پر مرے

وجد کرتا ہے صدائے نے یہ جوڑا سانپ کا

منڈ گئیں زلفیں ہیں شاعر کس سے اب دیں گے مثال

ہو گیا تشبیہ کی خاطر بھی توڑا سانپ کا

عمر بھر دل کو خیال گیسوئے پیچاں رہا

دھیان اس نادان نے ہرگز نہ چھوڑا سانپ کا

نقرئی موباف چوٹی میں رہا ان کی سدا

کینچلی نے عمر بھر پیچھا نہ چھوڑا سانپ کا

پڑ گئی ایذا دہندی کی تری زلفوں کو خو

کاٹتا ہے اڑ کے عاشق کو یہ جوڑا سانپ کا

کچھ سمجھ کر رہا ہوں یار کی زلفوں کی داشت

پالتا ہوں اپنے کٹوانے کو جوڑا سانپ کا

شام سے ان گیسوؤں کی یاد میں جو سو رہا

خواب میں دیکھا کیا تا صبح جوڑا سانپ کا

عشق میں گیسو و ابرو کے اگر دینی ہے جان

نیش عقرب کھا کے پی لے زہر تھوڑا سانپ کا

واسطے موذی کے آخر میں بھی موذی بن گیا

سر کسی حالت میں بے کچلے نہ چھوڑا سانپ کا

عشق گیسو میں نہ قطرہ بھی تلف ہونے دیا

زہر سارا حلق میں میں نے نچوڑا سانپ کا

خط پہ آتے ہیں بہت لہرا کے گیسو یار کے

سبزہ نوخیز پر غش ہے یہ جوڑا سانپ کا

حلقۂ گیسوئے شب کو ذرۂ افشاں چنی

رات کو چن چن کے اک اک دانت توڑا سانپ کا

ہر قدم پر مار کر سر کر رہا ہے ناگ پیچ

اب چلن سیکھا ہے اس موذی نے تھوڑا سانپ کا

دشمن جانی کو اپنے دی نہ ایذا رندؔ نے

دانت ہی توڑا نہ چھالا اس نے پھوڑا سانپ کا

zulfen chhoren hain ke jora us ne chhora sanp ka

dekhiye kis kis ko dasta hai ye jora sanp ka

gore galon par tire zulfen ye lahrati nahin

yasmin zar-e-sabahat mein hai jora sanp ka

ishq in zulfon ka mujh se tark hone ka nahin

hai mira ham zad ai naseh ye jora sanp ka

donon zulfen yar ki ulti hain balon par mire

wajd karta hai sadae ne ye jora sanp ka

mand gain zulfen hain shayar kis se ab denge misal

ho gaya tashbih ki khatir bhi tora sanp ka

umr bhar dil ko khayal gesu-e-pechan raha

dhyan is nadan ne hargiz na chhora sanp ka

nuqrai mubaf choti mein raha un ki sada

kenchli ne umr bhar pichha na chhora sanp ka

par gai iza danadi ki tiri zulfon ko khu

katta hai ur ke ashiq ko ye jora sanp ka

kuchh samajh kar raha hun yar ki zulfon ki dasht

palta hun apne katwane ko jora sanp ka

sham se un gesuon ki yad mein jo so raha

khwab mein dekha kiya ta subh jora sanp ka

ishq mein gesu-o-abru ke agar deni hai jan

nesh-e-aqrab kha ke pi le zahr thora sanp ka

waste muzi ke akhir mein bhi muzi ban gaya

sar kisi halat mein be kuchle na chhora sanp ka

ishq gesu mein na qatra bhi talaf hone diya

zahr sara halq mein main ne nichora sanp ka

khat pe ate hain bahut lahra ke gesu yar ke

sabza naukhez par ghash hai ye jora sanp ka

halqa-e-gesu-e-shab ko zarra-e-afshan chuni

rat ko chun chun ke ik ik dant tora sanp ka

har qadam par mar kar sar kar raha hai nag pech

ab chalan sikha hai is muzi ne thora sanp ka

dushman-e-jani ko apne di na iza rind ne

dant hi tora na chhala us ne phora sanp ka