زلف تیری نے پریشاں کیا اے یار مجھے

زلف تیری نے پریشاں کیا اے یار مجھے

تیری آنکھوں نے کیا آپ سا بیمار مجھے

دل بجھا جائے ہے اغیار کی شورش پہ مرا

سرد کرتی ہے تری گرمئ بازار مجھے

عقل ہی موجب تکلیف ہوئی ہے ناداں

کر گئی بے خبری آ کے خبردار مجھے

تخت اور چتر سلاطیں کو مبارک ہووے

بس ہے کوچے میں ترے سایۂ دیوار مجھے

جوں مثال اس کی نمودار ہوئی توں ہی بیاںؔ

طپش دل نے کیا خواب سے بیدار مجھے

zulf teri ne pareshan kiya ai yar mujhe

teri ankhon ne kiya ap sa bimar mujhe

dil bujha jae hai aghyar ki shorish pe mira

sard karti hai tiri garmi-e-bazar mujhe

aql hi mujib-e-taklif hui hai nadan

kar gai be khabari a ke khabardar mujhe

takht aur chitr salatin ko mubarak howe

bas hai kuche mein tire saya-e-diwar mujhe

jun misal us ki numudar hui tun hi bayan

tapish-e-dil ne kiya khwab se bedar mujhe