زمانہ ہے کہ گزرا جا رہا ہے

زمانہ ہے کہ گزرا جا رہا ہے

یہ دریا ہے کہ بہتا جا رہا ہے

وہ اٹھے درد اٹھا حشر اٹھا

مگر دل ہے کہ بیٹھا جا رہا ہے

لگی تھی ان کے قدموں سے قیامت

میں سمجھا ساتھ سایا جا رہا ہے

زمانے پر ہنسے کوئی کہ روئے

جو ہونا ہے وہ ہوتا جا رہا ہے

مرے داغ جگر کو پھول کہہ کر

مجھے کانٹوں میں کھینچا جا رہا ہے

بہار آئی کہ دن ہولی کے آئے

گلوں میں رنگ کھیلا جا رہا ہے

رواں ہے عمر اور انسان غافل

مسافر ہے کہ سوتا جا رہا ہے

سر میت ہے یہ عبرت کا نوحہ

محبت کا جنازہ جا رہا ہے

جلیلؔ اب دل کو اپنا دل نہ سمجھو

کوئی کر کے اشارا جا رہا ہے

zamana hai ke guzra ja raha hai

ye dariya hai ke bahta ja raha hai

wo uthe dard utha hashr utha

magar dil hai ke baitha ja raha hai

lagi thi un ke qadmon se qayamat

main samjha sath saya ja raha hai

zamane par hanse koi ke roe

jo hona hai wo hota ja raha hai

mire dagh-e-jigar ko phul kah kar

mujhe kanton mein khincha ja raha hai

bahar ai ke din holi ke ae

gulon mein rang khela ja raha hai

rawan hai umr aur insan ghafil

musafir hai ke sota ja raha hai

sar-e-mayyat hai ye ibrat ka nauha

mohabbat ka janaza ja raha hai

jalil ab dil ko apna dil na samjho

koi kar ke ishara ja raha hai