زعم نہ کیجو شمع رو بزم کے سوز و ساز پر

زعم نہ کیجو شمع رو بزم کے سوز و ساز پر

رکھیو نظر بجائے ناز خاطر پیر ناز پر

زیب نہیں ہے شیخ یہ مے کش پاکباز پر

تہمتیں سو لگائے گا داغ جبیں نیاز پر

کہتا ہوں ہر حسیں سے میں نیت عشق ہے مری

آئے گا میرا دل مگر شاہد دل نواز پر

فرق حیات و مرگ کا مرغ چمن کے دل سے پوچھ

دیتا ہے فوق دام کو چنگل شاہباز پر

خواب لحد ہے پر سکوں عہد حیات پر الم

موت نہ کیوں ہو طعنہ زن زندگئ دراز پر

سنگ در حبیب پر ہوتا ہوں سجدہ ریز میں

خلق خدا ہے معترض مجھ پہ مری نماز پر

منعم بے بصر یوں ہی دیکھیے تا کجا رہے

محو نشاط و خوش دلی نغمۂ تار ساز پر

فخر عمل نہ چاہیئے سعی عمل ضرور ہے

آنکھ رہے لگی ہوئی رحمت کارساز پر

در پہ بتوں کے دی صدا سائلؔ بے نوا نے یہ

فضل خدا رہے مدام حال گدا نواز پر

zaam na kijo shama ro bazm ke soz-o-saz par

rakhiyo nazar bajae naz-e-khatir-e-pir-e-naz par

zeb nahin hai shaikh ye mai kash-e-pakbaz par

tohmaten so lagaega dagh jabin niyaz par

kahta hun har hasin se main niyyat-e-ishq hai miri

aega mera dil magar shahid-e-dil nawaz par

farq-e-hayat-o-marg ka murgh-e-chaman ke dil se puchh

deta hai fauq dam ko changul shahbaz par

khwab-e-lahad hai pur sakun ahd-e-hayat par alam

maut na kyun ho taana zan zindagi-e-daraz par

sang-e-dar-e-habib par hota hun sajda rez mein

khalq-e-khuda hai motariz mujh pe miri namaz par

munam-e-be basar yun hi dekhiye ta kuja rahe

mahw-e-nishat-o-khush dili naghma-e-tar saz par

fakhr-e-amal na chahiye sai-e-amal zarur hai

ankh rahe lagi hui rahmat-e-karsaz par

dar pe buton ke di sada sail-e-be nawa ne ye

fazl-e-khuda rahe mudam hal gada nawaz par