زانو پر اس کے رات رہا سر تمام رات — ابراہیم عاجز (Ibraheem Aajiz)

زانو پر اس کے رات رہا سر تمام رات

پیش نظر رہا رخ دلبر تمام رات

کس سے کہوں کٹی مری کیوں کر تمام رات

تڑپا کیا مرا دل مضطر تمام رات

بیٹھا رہا ہوں شام سے اکثر تمام رات

گنتا رہا ہوں ہجر میں اختر تمام رات

ایسا بندھا تصور ابرو کہ خواب میں

کاٹا کیا گلا دم خنجر تمام رات

کیا جانتا ہے وحشت شبہائے تار کو

کاٹی ہو جیسے شمع جلا کر تمام رات

ہو گرچہ بے نوا وہی سلطان وقت ہے

جس کو ہے وصل یار میسر تمام رات

اے عاجزؔ ان کی کیوں نہ دعا مستجاب ہو

کرتے ہیں جو عبادت داور تمام رات