رہتا ہے ہمیشہ جو مری یار بغل میں

رہتا ہے ہمیشہ جو مری یار بغل میں

جلتے ہیں اسے دیکھ کے اغیار بغل میں

کیا لطف ہو گر عیش کے سامان بہم ہوں

معشوق بھی ہو شوخ طرحدار بغل میں

ہر وقت جو آغوش میں رہتا تھا ہماری

اب اوس کو لیے پھرتے ہیں اغیار بغل میں

کس طرح میں سمجھوں کہ وہ کرتے ہیں محبت

آتے نہیں بھولے سے بھی اک بار بغل میں

مے نوشی کا جب حظ ہے کہ ہو بر لب دریا

ساغر ہو اگر ہاتھ میں تو یار بغل میں

سب مٹ گئی ہاجرؔ شب فرقت کی مصیبت

خوب اس کو دبا کر جو کیا پیار بغل میں

rahta hai hamesha jo miri yar baghal mein

jalte hain use dekh ke aghyar baghal mein

kya lutf ho gar aish ke saman baham hun

maashuq bhi ho shokh tarhdar baghal mein

har waqt jo aghosh mein rahta tha hamari

ab os ko liye phirte hain aghyar baghal mein

kis tarah main samjhun ke wo karte hain mohabbat

ate nahin bhule se bhi ik bar baghal mein

mai noshi ka jab haz hai ke ho bar lab-e-dariya

saghar ho agar hath mein to yar baghal mein

sab mit gai hajir shab-e-furqat ki musibat

khub us ko daba kar jo kiya pyar baghal mein