رہتا ہے ہڈیوں سے مری جو ہما لگا

رہتا ہے ہڈیوں سے مری جو ہما لگا

کچھ درد عاشقی کا اسے بھی مزہ لگا

غافل نہ سوز عشق سے رہ پھر کباب ہے

گر لائحہ اس آگ کا ٹک دل کو جا لگا

دیکھا ہمیں جہاں وہ تہاں آگ ہو گیا

بھڑکا رکھا ہے لوگوں نے اس کو لگا لگا

مہلت تنک بھی ہو تو سخن کچھ اثر کرے

میں اٹھ گیا کہ غیر ترے کانوں آ لگا

اب آب چشم ہی ہے ہمارا محیط خلق

دریا کو ہم نے کب کا کنارے رکھا لگا

ہر چند اس کی تیغ ستم تھی بلند لیک

وہ طور بد ہمیں تو قیامت بھلا لگا

مجلس میں اس کی بار نہ مجھ کو ملی کبھو

دروازے ہی سے گرچہ بہت میں رہا لگا

بوسہ لبوں کا مانگتے ہی منہ بگڑ گیا

کیا اتنی میری بات کا تم کو برا لگا

عالم کی سیر میرؔ کی صحبت میں ہو گئی

طالع سے میرے ہاتھ یہ بے دست و پا لگا

rahta hai haddiyon se miri jo huma laga

kuchh dard ashiqi ka use bhi maza laga

ghafil na soz-e-ishq se rah phir kabab hai

gar laiha is ag ka tuk dil ko ja laga

dekha hamen jahan wo tahan ag ho gaya

bharka rakha hai logon ne us ko laga laga

mohlat tunuk bhi ho to sukhan kuchh asar kare

main uth gaya ke ghair tire kanon a laga

ab ab-e-chashm hi hai hamara muhit-e-khalq

dariya ko ham ne kab ka kinare rakha laga

har chand us ki tegh-e-sitam thi buland lek

wo tur bad hamen to qayamat bhala laga

majlis mein us ki bar na mujh ko mili kabhu

darwaze hi se garche bahut mein raha laga

bosa labon ka mangte hi munh bigar gaya

kya itni meri bat ka tum ko bura laga

alam ki sair mir ki sohbat mein ho gai

tale se mere hath ye be dast-o-pa laga