رہنے دے شب اپنے پاس مجھ کو

رہنے دے شب اپنے پاس مجھ کو

اوروں سا نہ کر قیاس مجھ کو

رہ جا کہ کہوں گا حال دل کا

آ جائیں تنک حواس مجھ کو

دل نازک و کار عشق در پیش

اپنا ہے نپٹ ہراس مجھ کو

یارب گیا کون یاں سے مہماں

لگتا ہے یہ گھر اداس مجھ کو

محرم سے تو سنیو حال میرا

نئیں طاقت التماس مجھ کو

حیرت نے کیا ہے یک جہاں کا

جوں آئینہ روشناس مجھ کو

کو جامۂ خاک و خوں کہ قائمؔ

سجتا تھا وہی لباس مجھ کو

rahne de shab apne pas mujh ko

auron sa na kar qayas mujh ko

rah ja ke kahunga hal-e-dil ka

a jaen tunuk hawas mujh ko

dil nazuk-o-kar-e-ishq dar pesh

apna hai nipat hiras mujh ko

yarab gaya kaun yan se mehman

lagta hai ye ghar udas mujh ko

mahram se to suniyo hal mera

nain taqat iltimas mujh ko

hairat ne kiya hai yak jahan ka

jun aina rushanas mujh ko

ko jama-e-khak-o-khun ke qaim

sajta tha wahi libas mujh ko