رہے نہ ایک بھی بیداد گر ستم باقی

رہے نہ ایک بھی بیداد گر ستم باقی

رکے نہ ہاتھ ابھی تک ہے دم میں دم باقی

اٹھا دوئی کا جو پردا ہماری آنکھوں سے

تو کعبے میں بھی رہا بس وہی صنم باقی

بلا لو بالیں پہ حسرت نہ دل میں میرے رہے

ابھی تلک تو ہے تن میں ہمارے دم باقی

لحد پہ آئیں گے اور پھول بھی اٹھائیں گے

یہ رنج ہے کہ نہ اس وقت ہوں گے ہم باقی

یہ چار دن کے تماشے ہیں آہ دنیا کے

رہا جہاں میں سکندر نہ اور نہ جم باقی

تم آؤ تار سے مرقد پہ ہم قدم چومیں

فقط یہی ہے تمنا تری قسم باقی

رساؔ یہ رنج اٹھایا فراق میں تیرے

رہے جہاں میں نہ آخر کو آہ ہم باقی

rahe na ek bhi bedad gar sitam baqi

ruke na hath abhi tak hai dam mein dam baqi

utha dui ka jo parda hamari ankhon se

tu kaabe mein bhi raha bas wahi sanam baqi

bala lo balin pe hasrat na dil mein mere rahe

abhi talak to hai tan mein hamare dam baqi

lahad pe aenge aur phul bhi uthaenge

ye ranj hai ke na is waqt honge ham baqi

ye char din ke tamashe hain ah duniya ke

raha jahan mein sikandar na aur na jam baqi

tum ao tar se marqad pe ham qadam chumen

faqat yahi hai tamanna tiri qasam baqi

rasa ye ranj uthaya firaq mein tere

rahe jahan mein na akhir ko ah ham baqi