رکھے ہیں آپ ہاتھ جہاں اب وہاں نہیں — صفدر مرزا پوری

Arooz is now on the App Store, for iPhone and iPad. Download →

صفدر مرزا پوری

رکھے ہیں آپ ہاتھ جہاں اب وہاں نہیں

ہم کیا بتائیں درد کہاں ہے کہاں نہیں

دل لے گئے وہ درد محبت کہاں رہے

عبرت کا ہے محل کہ مکیں ہے مکاں نہیں

اے برق کس کے واسطے بیتاب آج ہے

اس باغ میں مرا تو کہیں آشیاں نہیں

قاتل سمجھ کے آج ذرا تیغ ناز کھینچ

یہ امتحاں ترا ہے مرا امتحاں نہیں

چھوٹیں گے عمر بھر تری زلفوں کے کیا اسیر

کاٹے کٹیں کسی کے یہ وہ بیڑیاں نہیں

لو اک جہاں انہیں کا طرف دار ہو گیا

محشر میں آج کوئی مرا ہم زباں نہیں

دنیا میں حشر اٹھے بھی تو کیا دیکھ کر اٹھے

مرے مزار کا تو کہیں بھی نشاں نہیں

تم کیا بدل گئے زمانہ بدل گیا

اب وہ زمیں نہیں ہے وہ اب آسماں نہیں

مسکن زمین شعر میں صفدرؔ بنا لیا

رہتے ہیں اس زمیں پہ جہاں آسماں نہیں