روکتا ہے غم اظہار سے پندار مجھے

روکتا ہے غم اظہار سے پندار مجھے

میرے اشکوں سے چھپا لے مرے رخسار مجھے

دیکھ اے دشت جنوں بھید نہ کھلنے پائے

ڈھونڈنے آئے ہیں گھر کے در و دیوار مجھے

سی دیے ہونٹ اسی شخص کی مجبوری نے

جس کی قربت نے کیا محرم اسرار مجھے

میری آنکھوں کی طرف دیکھ رہے ہیں انجم

جیسے پہچان گئی روح شب تار مجھے

جنس ویرانی صحرا میری دوکان میں ہے

کیا خریدے گا ترے شہر کا بازار مجھے

جرس گل نے کئی بار پکارا لیکن

لے گئی راہ سے زنجیر کی جھنکار مجھے

ناوک ظلم اٹھا دشنۂ اندوہ سنبھال

لطف کے خنجر بے نام سے مت مار مجھے

ساری دنیا میں گھنی رات کا سناٹا تھا

صحن زنداں میں ملے صبح کے آثار مجھے

rokta hai gham-e-izhar se pindar mujhe

mere ashkon se chhupa le mire rukhsar mujhe

dekh ai dasht-e-junun bhed na khulne pae

dhundne ae hain ghar ke dar-o-diwar mujhe

si diye hont usi shakhs ki majburi ne

jis ki qurbat ne kiya mahram-e-asrar mujhe

meri ankhon ki taraf dekh rahe hain anjum

jaise pahchan gai ruh shab-e-tar mujhe

jins-e-wirani sahra meri dukan mein hai

kya kharidega tire shahr ka bazar mujhe

jaras-e-gul ne kai bar pukara lekin

le gai rah se zanjir ki jhankar mujhe

nawak-e-zulm utha dashna-e-andoh sambhal

lutf ke khanjar-e-be nam se mat mar mujhe

sari duniya mein ghani rat ka sannata tha

sehn-e-zindan mein mile subh ke asar mujhe