رونے سے جو بھڑاس تھی دل کی نکل گئی

رونے سے جو بھڑاس تھی دل کی نکل گئی

آنسو بہائے چار طبیعت سنبھل گئی

میں نے ترس ترس کے گزاری ہے ساری عمر

میری نہ ہوگی جان جو حسرت نکل گئی

بے چین ہوں میں جب سے نہیں دل لگی کہیں

وہ درد کیا گیا کہ مرے دل کی کل گئی

کہتا ہے چارہ گر کہ نہ پائے گا اندمال

اچھا ہوا کہ زخم کی صورت بدل گئی

اے شمع ہم سے سوز محبت کے ضبط سیکھ

کم بخت ایک رات میں ساری پگھل گئی

شاخ نہال عمر ہماری نہ پھل سکی

یہ تو ہے وہ کلی جو نکلتے ہی جل گئی

دیکھا جو اس نے پیار سے اغیار کی طرف

شاعرؔ قسم خدا کی مری جان جل گئی

rone se jo bhirus thi dil ki nikal gai

ansu bahae char tabiat sambhal gai

main ne taras taras ke guzari hai sari umr

meri na hogi jan jo hasrat nikal gai

be chain hun main jab se nahin dil lagi kahin

wo dard kya gaya ke mire dil ki kal gai

kahta hai chara gar ke na paega indimal

achchha hua ke zakhm ki surat badal gai

ai shama ham se soz-e-mohabbat ke zabt sikh

kam bakht ek rat mein sari pighal gai

shakh-e-nihal-e-umr hamari na phal saki

ye to hai wo kali jo nikalte hi jal gai

dekha jo us ne pyar se aghyar ki taraf

shayar qasam khuda ki miri jan jal gai