رہ گئے اشکوں میں لخت جگر آتے آتے

رہ گئے اشکوں میں لخت جگر آتے آتے

رک گئے بحر سے لعل و گہر آتے آتے

تھم گئے قطرۂ خون جگر آتے آتے

رک گئے مجمر دل سے شرر آتے آتے

ہوتے ہوتے نہ ہوا مصرع رنگیں موزوں

بند کیوں ہو گیا خون جگر آتے آتے

تھم گئے اشک مرے آنکھ سے ڈھلتے ڈھلتے

رہ گئے چشم صدف سے گہر آتے آتے

رہ گیا کہنے پہ غمازوں کے سن سن کے مری

پھر گیا یار مرا راہ پر آتے آتے

دے دیا نقد دل اس بت کو بغیر از جانے

ہو گیا راہ میں کیسا ضرر آتے آتے

دیکھتے دیکھتے دیکھیں گے مرے جوہر طبع

آئیں گے آئیں گے اہل نظر آتے آتے

کیا بھرا زنگ کدورت سے یہ آئینہ دل

جو نظر آئے نہ وہ پھر نظر آتے آتے

گردش چشم نے کس کو تہ و بالا نہ کیا

ہو گئے زیر و زبر راہ پر آتے آتے

اشک خونی نہیں آتے ہیں جو آنکھوں سے تری

کیوں رکی منتہیؔ دل کی خبر آتے آتے

rah gae ashkon mein lakht-e-jigar ate ate

ruk gae bahr se laal-o-guhar ate ate

tham gae qatra-e-khun-e-jigar ate ate

ruk gae mijmar-e-dil se sharar ate ate

hote hote na hua misra-e-rangin mauzun

band kyun ho gaya khun-e-jigar ate ate

tham gae ashk mire ankh se dhalte dhalte

rah gae chashm-e-sadaf se guhar ate ate

rah gaya kahne pe ghammazon ke sun sun ke miri

phir gaya yar mira rah par ate ate

de diya naqd-e-dil us but ko baghair az jane

ho gaya rah mein kaisa zarar ate ate

dekhte dekhte dekhenge mire jauhar-e-taba

aenge aenge ahl-e-nazar ate ate

kya bhara zang kudurat se ye aina-e-dil

jo nazar ae na wo phir nazar ate ate

gardish-e-chashm ne kis ko tah-o-bala na kiya

ho gae zer-o-zabar rah par ate ate

ashk-e-khuni nahin ate hain jo ankhon se tiri

kyun ruki muntahi dil ki khabar ate ate