رکھیں ہیں جی میں مگر مجھ سے بد گمانی آپ

رکھیں ہیں جی میں مگر مجھ سے بد گمانی آپ

جو میرے ہاتھ سے پیتے نہیں ہیں پانی آپ

گھڑی گھڑی نہ کریں ہم پہ مہربانی آپ

کہ حسن رکھتے ہیں اور عالم جوانی آپ

میں بوسہ لے لے کے رخ کا اٹھا دیا پردہ

اسی غرور پہ کرتے تھے لن ترانی آپ

میں اپنا حال جو کہنے لگا تو یوں بولا

"سنے ہے کون؟ کہا کیجیے کہانی آپ"

میں بے گناہ سزا وار گالیوں کا نہیں

نہ میرے ساتھ کریں اتنی بد زبانی آپ

مصوروں نے قلم رکھ دیے ہیں ہاتھوں سے

بناویں آئنے میں اپنا نقش ثانی آپ

وفا کی اس سے طلب کر نہ ہرگز اے ناداں

کہ بے وفا ہے طلسم جہان فانی آپ

شراب وصل کا کس کی پیا ہے یہ ساغر

خمار شب سے جو رکھتے ہیں سرگرانی آپ

یہ بے وفا بھی میاں مصحفیؔ کسی کے ہوئے

بتوں پہ کرتے ہو کیوں اتنی جانفشانی آپ

rakhen hain ji mein magar mujh se bad gumani ap

jo mere hath se pite nahin hain pani ap

ghari ghari na karen ham pe mehrbani ap

ke husn rakhte hain aur alam-e-jawani ap

main bosa le le ke rukh ka utha diya parda

isi ghurur pe karte the lan tarani ap

main apna hal jo kahne laga to yun bola

"sune hai kaun? kaha kijiye kahani ap"

main be gunah saza war galiyon ka nahin

na mere sath karen itni bad zabani ap

musawwiron ne qalam rakh diye hain hathon se

banawen aine mein apna naqsh-e-sani ap

wafa ki us se talab kar na hargiz ai nadan

ke be wafa hai tilism-e-jahan-e-fani ap

sharab wasl ka kis ki piya hai ye saghar

khumar-e-shab se jo rakhte hain sargirani ap

ye be wafa bhi miyan mushafi kisi ke hue

buton pe karte ho kyun itni janfishani ap