رو کے ان آنکھوں نے دریا کر دیا — غلام علی ہمدانی مصحفی (Mushafi Ghulam Hamdani)

رو کے ان آنکھوں نے دریا کر دیا

ابر کو پانی سے پتلا کر دیا

حسن ہے اک فتنہ گر اس نے وہیں

جس کو چاہا اس کو رسوا کر دیا

تم نے کچھ ساقی کی کل دیکھی ادا

مجھ کو ساغر مے کا چھلکا کر دیا

بیٹھے بیٹھے پھر گئیں آنکھیں مری

مجھ کو ان آنکھوں نے یہ کیا کر دیا

اس نے جب مجھ پر چلائی تیغ ہائے

کیوں میں اپنا ہاتھ اونچا کر دیا

مصحفیؔ کے دیکھ یوں چہرے کا رنگ

عشق نے کیا اس کا نقشا کر دیا