روئے تاباں مانگ موئے سر دھواں بتی چراغ

روئے تاباں مانگ موئے سر دھواں بتی چراغ

کیا نہیں انساں کی گردن پر دھواں بتی چراغ

کچھ نہ پوچھو زاہدوں کے باطن و ظاہر کا حال

ہے اندھیرا گھر میں اور باہر دھواں بتی چراغ

دود‌ افغان و رگ جان و سویدا دل میں ہے

بند ہے قندیل کے اندر دھواں بتی چراغ

طور پر جا کر چراغ طور کیوں دیکھے کوئی

کیا مکانوں میں نہیں پتھر دھواں بتی چراغ

ہو موافق کیوں کر اے پروانے سایہ گستری

ہے مخالف زیر بال و پر دھواں بتی چراغ

کانپتا ہے ہاتھ تاثیر دل بیتاب سے

میں کروں روشن تو ہو مضطر دھواں بتی چراغ

صورت بخشش دکھاویں کاغذ و سطر و حروف

ہو عمل نامہ سر محشر دھواں بتی چراغ

خضر ہے بحری مسافر کا منار روشنی

ہے جہازوں کے لیے رہبر دھواں بتی چراغ

کیا ضرورت روشنی کی بے خودی کی بزم میں

زلف ساقی‌ موج مے ساغر دھواں بتی چراغ

شعلہ‌ رویوں کے مقابل رنگ جمتا ہی نہیں

اڑ نہ جائے بزم سے بن کر دھواں بتی چراغ

کس سلیقہ سے ہے روشن محفل‌ ارض و سما

آسماں پر چاند ہے گھر گھر دھواں بتی چراغ

صبح تک کرتے رہے روشن دلوں سے ہمسری

شام سے روشن نفس ہو کر دھواں بتی چراغ

عشق کی گرمی نے پھونکا پردے پردے میں مجھے

میری چادر میں مرا بستر دھواں بتی چراغ

زلف و رخسار و نظر ہیں دشمن ایمان و دیں

لوٹنے نکلے ہیں وہ لے کر دھواں بتی چراغ

میں وہ طائر ہوں جو ہوں کم خرچ اور بالا نشیں

ایک جگنو یاں ہے اور گھر گھر دھواں بتی چراغ

شب کو مائلؔ وقت آرایش مصاحب تھے یہی

پھول سرمہ آئنہ زیور دھواں بتی چراغ

ru-e-taban mang mu-e-sar dhuan batti charagh

kya nahin insan ki gardan par dhuan batti charagh

kuchh na puchho zahidon ke batin-o-zahir ka hal

hai andhera ghar mein aur bahar dhuan batti charagh

dud-e-afghan-o-rag-e-jan-o-suwaida dil mein hai

band hai qindil ke andar dhuan batti charagh

tur par ja kar charagh-e-tur kyun dekhe koi

kya makanon mein nahin patthar dhuan batti charagh

ho muafiq kyun kar ai parwane saya gustari

hai mukhalif zer-e-bal-o-par dhuan batti charagh

kanpta hai hath tasir-e-dil-e-betab se

main karun raushan to ho muztar dhuan batti charagh

surat-e-bakhshish dikhawen kaghaz-o-satr-o-huruf

ho amal nama sar-e-mahshar dhuan batti charagh

khizr hai bahri musafir ka manar-e-raushni

hai jahazon ke liye rahbar dhuan batti charagh

kya zarurat raushni ki be khudi ki bazm mein

zulf-e-saqi mauj-e-mai saghar dhuan batti charagh

shola rawiyon ke muqabil rang jamta hi nahin

ur na jae bazm se ban kar dhuan batti charagh

kis saliqa se hai raushan mahfil-e-arz-o-sama

asman par chand hai ghar ghar dhuan batti charagh

subh tak karte rahe raushan dilon se hamsiri

sham se raushan nafas ho kar dhuan batti charagh

ishq ki garmi ne phunka parde parde mein mujhe

meri chadar mein mira bistar dhuan batti charagh

zulf-o-rukhsar-o-nazar hain dushman-e-iman-o-din

lautne nikle hain wo le kar dhuan batti charagh

main wo tair hun jo hun kam kharch aur bala nashin

ek jugnu yan hai aur ghar ghar dhuan batti charagh

shab ko mail waqt arayish musahib the yahi

phul surma aina zewar dhuan batti charagh