رواں دواں نہیں یاں اشک چشم تر کی طرح

رواں دواں نہیں یاں اشک چشم تر کی طرح

گرہ میں رکھتے ہیں ہم آبرو گہر کی طرح

سنی صفت کسی خوش چشم کی جو مردم سے

خیال دوڑ گیا آنکھ پر نظر کی طرح

چھپی نہ خلق خدا سے حقیقت خط شوق

اڑا جہاں میں کبوتر مرا خبر کی طرح

سوائے یار نہ دیکھا کچھ اور عالم میں

سما گیا وہ مری آنکھ میں نظر کی طرح

عدم کی راہ میں کھٹکا رہا جہنم کا

سفر نے دل کو جلایا مرے سقر کی طرح

کھلے جو سب تو بندھا تار میٹھی باتوں کا

شکر گرہ میں وہ رکھتے ہیں نیشکر کی طرح

وہ عندلیب ہوں شہپر جو میرا مل جائے

چڑھائیں سر پہ سلاطیں ہما کے پر کی طرح

زکوٰۃ دے زر گل کی بہار میں گلچیں

چمن میں پھول لٹا اشرفی کے زر کی طرح

گری ہے چھٹ کے جو زانو پہ شام کو افشاں

ستارے یار کے دامن میں ہیں سحر کی طرح

مشاعرے کا امانتؔ ہے کس کو ہجر میں ہوش

کہاں کے شعر کہاں کی غزل کدھر کی طرح

rawan dawan nahin yan ashk-e-chashm-e-tar ki tarah

girah mein rakhte hain ham abru guhar ki tarah

suni sifat kisi khush chashm ki jo mardum se

khayal daur gaya ankh par nazar ki tarah

chhupi na khalq-e-khuda se haqiqat-e-khat shauq

ura jahan mein kabutar mira khabar ki tarah

siwae yar na dekha kuchh aur alam mein

sama gaya wo miri ankh mein nazar ki tarah

adam ki rah mein khatka raha jahannam ka

safar ne dil ko jalaya mire saqr ki tarah

khule jo sab to bandha tar mithi baton ka

shukr girah mein wo rakhte hain nishukr ki tarah

wo andalib hun shahpar jo mera mil jae

charhaen sar pe salatin huma ke par ki tarah

zakwat de zar-e-gul ki bahar mein gulchin

chaman mein phul luta ashrafi ke zar ki tarah

giri hai chhut ke jo zanu pe sham ko afshan

sitare yar ke daman mein hain sahar ki tarah

mushaare ka amanat hai kis ko hijr mein hosh

kahan ke sher kahan ki ghazal kidhar ki tarah