روشن ہزار چند ہیں شمس و قمر سے آپ

روشن ہزار چند ہیں شمس و قمر سے آپ

غائب ہیں پر نگاہ کی صورت نظر سے آپ

آنکھیں بچھاتے پھرتے ہیں مشتاق راہ میں

کیا جانیے گزرتے ہیں کس رہ گزر سے آپ

روئے کوئی غریب تو ہنسنا نہ چاہئے

واقف نہیں کسی کے فغان اثر سے آپ

کانٹے بھرے ہیں خط میں جو چھوتے نہیں اسے

اتنا نہ ہاتھ کھینچیے میری خبر سے آپ

رہ گیر کیوں تڑپتے ہیں تشویش تھی مجھے

اب کھل گیا کہ جھانکتے ہیں چاک در سے آپ

حمام نے تو اور بھی چمکا دیا بدن

گویا نہا کے نکلے ہیں آب گہر سے آپ

لائیں گے راہ پر یہ رخ و زلف ایک دن

دیکھیں گے شام تک مرا رستہ سحر سے آپ

آنکھوں کی طرح رونے لگیں روزن مکاں

پوچھیں ہمارا حال جو دیوار و در سے آپ

مریخ پن مزاج میں اعضا میں نازکی

تیغ شعاع باندھئے اپنی کمر سے آپ

اے زاہدان خشک یہ غیرت کا ہے مقام

آگاہ آج تک نہیں خالق کے گھر سے آپ

ظاہر ہے مرغ قبلہ نما بھی گواہ ہے

کعبے کی سمت پوچھتے ہیں جانور سے آپ

کیوں کر ملک کہوں کہ ملک خادم آپ کے

ہیں وہ بشر کہ ملتی ہیں خیر البشر سے آپ

جو بات آپ کی ہے مشیت خدا کی ہے

بے شبہ مختلط ہیں قضا و قدر سے آپ

پھسلا ہے میرے آنسوؤں میں پاؤں آپ کا

بندے کا سر اتارئیے آج اپنے سر سے آپ

اے بحرؔ رحم کھائے گا وہ رونے پر ضرور

دھو رکھئے اپنے منہ کو ذرا چشم تر سے آپ

raushan hazar chand hain shams-o-qamar se ap

ghaib hain par nigah ki surat nazar se ap

ankhen bichhate phirte hain mushtaq rah mein

kya janiye guzarte hain kis rah guzar se ap

roe koi gharib to hansna na chahiye

waqif nahin kisi ke fughan-e-asar se ap

kante bhare hain khat mein jo chhute nahin use

itna na hath khinchiye meri khabar se ap

rah gir kyun tarapte hain tashwish thi mujhe

ab khul gaya ke jhankte hain chak dar se ap

hammam ne to aur bhi chamka diya badan

goya naha ke nikle hain ab-e-guhar se ap

laenge rah par ye rukh-o-zulf ek din

dekhenge sham tak mira rasta sahar se ap

ankhon ki tarah rone lagen rauzan-e-makan

puchhen hamara hal jo diwar-o-dar se ap

mirrikh pan mizaj mein aaza mein nazuki

tegh-e-shua bandhiye apni kamar se ap

ai zahidan-e-khushk ye ghairat ka hai maqam

agah aj tak nahin khaliq ke ghar se ap

zahir hai murgh-e-qibla numa bhi gawah hai

kaabe ki samt puchhte hain janwar se ap

kyun kar malak kahun ke malak khadim ap ke

hain wo bashar ke milti hain khair albashar se ap

jo bat ap ki hai mashiyyat khuda ki hai

be shuba mukhtalat hain qaza-o-qadar se ap

phisla hai mere ansuon mein paon ap ka

bande ka sar utariye aj apne sar se ap

ai bahr rahm khaega wo rone par zarur

dho rakhiye apne munh ko zara chashm-e-tar se ap