رنگت یہ رخ کی اور یہ عالم نقاب کا

رنگت یہ رخ کی اور یہ عالم نقاب کا

دامن میں کوئی پھول لیے ہے گلاب کا

چاروں طرف سے اس پہ نگاہوں کا بار ہے

مشکل ہے ان کو رخ سے اٹھانا نقاب کا

تسکین خاک دیتے ہیں رکھ کر جگر پہ ہاتھ

پہلو بدل رہے ہیں مرے اضطراب کا

مدت ہوئی وہی ہے زمانے کا انقلاب

نقشا کھنچا ہوا ہے مرے اضطراب کا

بچپن کہاں تک ان کی امنگوں کو روکتا

آخر کو رنگ پھوٹ ہی نکلا شباب کا

رونا خوشی کا روتی ہے بلبل بہار میں

چھڑکاؤ ہو رہا ہے چمن میں گلاب کا

جھلکی دکھا کے اور وہ بجلی گرا گئے

اچھا کیا علاج مرے اضطراب کا

خاک چمن پہ شبنم و گل کا عجب ہے رنگ

ساغر کسی سے چھوٹ پڑا ہے شراب کا

کھوئے ہوئے ہیں شاہد و معنی کی دھن میں ہم

یہ بھی جلیلؔ ایک جنوں ہے شباب کا

rangat ye rukh ki aur ye alam naqab ka

daman mein koi phul liye hai gulab ka

charon taraf se us pe nigahon ka bar hai

mushkil hai un ko rukh se uthana naqab ka

taskin-e-khak dete hain rakh kar jigar pe hath

pahlu badal rahe hain mire iztirab ka

muddat hui wahi hai zamane ka inqilab

naqsha khincha hua hai mire iztirab ka

bachpan kahan tak un ki umangon ko rokta

akhir ko rang phut hi nikla shabab ka

rona khushi ka roti hai bulbul bahar mein

chhirkao ho raha hai chaman mein gulab ka

jhalki dikha ke aur wo bijli gira gae

achchha kiya ilaj mire iztirab ka

khak-e-chaman pe shabnam-o-gul ka ajab hai rang

saghar kisi se chhut para hai sharab ka

khoe hue hain shahid-o-maani ki dhun mein ham

ye bhi jalil ek junun hai shabab ka