رنگ میلا نہ ہوا جامۂ عریانی کا

رنگ میلا نہ ہوا جامۂ عریانی کا

سر و ساماں ہے ہمیں بے سر و سامانی کا

آئینہ دیکھے ہے وہ اور اسے آئینہ

زور عالم ہے دلا عالم حیرانی کا

دم ہستی پہ حباب اپنی عبث ابھرے تھا

آنکھ کھلتے ہی مقام اس پہ کھلا فانی کا

تشنگی خاک بجھے اشک کی طغیانی سے

عین برسات میں بگڑے ہے مزا پانی کا

زلف گر کھینچ سکے یار کے تو شانے سے

ہاتھ یک دست قلم کیجئے گا مانیؔ کا

جھڑ گئی ابر بہاری کی بھی شیخی لیکن

نہ گھٹا زور مرے اشک کی طغیانی کا

اے جنوں روز رہے ہے مرے دامن سے لگا

ہوں قدم بوس نہ کیوں خار بیابانی کا

کیوں نہ انگشت نما ہووے ہلال ابرو

زور عالم ہے ترے قشقۂ پیشانی کا

دل نہ چھٹ زلف بتاں چشم کا باندھے ہے خیال

یاد مضموں ہے پریشاں کو پریشانی کا

جام و مینا جو بنے آبلہ و داغ نصیرؔ

دل نے سامان کیا کس کی یہ مہمانی کا

rang maila na hua jama-e-uryani ka

sar-o-saman hai hamen be sar-o-samani ka

aina dekhe hai wo aur use aina

zor-e-alam hai dila alam-e-hairani ka

dam-e-hasti pe habab apni abas ubhre tha

ankh khulte hi maqam us pe khula fani ka

tishnagi khak bujhe ashk ki tughyani se

ain barsat mein bigre hai maza pani ka

zulf gar khinch sake yar ke to shane se

hath yak dast-e-qalam kijiye ga mani ka

jhar gai abr-e-bahari ki bhi shekhi lekin

na ghata zor mire ashk ki tughyani ka

ai junun roz rahe hai mire daman se laga

hun qadam bos na kyun khar bayabani ka

kyun na angusht numa howe hilal-e-abru

zor-e-alam hai tire qashqa-e-peshani ka

dil na chhut zulf-e-butan chashm ka bandhe hai khayal

yad mazmun hai pareshan ko pareshani ka

jam-o-mina jo bane abla-o-dagh nasir

dil ne saman kiya kis ki ye mehmani ka