روزِ غم میں کیا قیامت ہے شبِ عشرت کی یاد — مصطفیٰ خان شیفتہ (Mustafa Khan Shefta)

روزِ غم میں کیا قیامت ہے شبِ عشرت کی یاد

اشکِ خوں سے آ گئیں رنگینیاں صحبت کی یاد

میری حالت دیکھ لو تغئیر کتنی ہو چکی

وصل کے دن دم بہ دم کیوں شیشۂ ساعت کی یاد

میں ہوں بے کس اور بے کس پر ترحم ہے ضرور

حسنِ روز افزوں دلا دینا مری حالت کی یاد

طاقتِ جنبش نہیں اس حال پہ قصدِ عدم

مر گئے پر بھی رہے گی اپنی اس ہمت کی یاد

غالباً ایامِ حرماں بے خودی میں کٹ گئے

آتی ہے پھر آرزو بھولی ہوئی مدت کی یاد

دل لگانے کا ارادہ پھر ہے شائد شیفتہ

ایسی حسرت سے جو ہے گزری ہوئی الفت کی یاد