دیکھ اپنے قرار کرنے کو

دیکھ اپنے قرار کرنے کو

اور مرے انتظار کرنے کو

تمہیں دیکھے سے کیا تسلی ہو

جی تو ہوتا ہے پیار کرنے کو

میری تدبیر اک نہیں کرتا

ہیں نصیحت ہزار کرنے کو

وہ وہ صدمے سہے شب غم میں

چاہیئے دن شمار کرنے کو

وہ گر آئیں تو پاس کیا ہے اور

ایک جاں ہے نثار کرنے کو

جھوٹے وعدے کیا نہ کیجے آپ

مفت امیدوار کرنے کو

آپ ہیں روٹھنے ہی کو اور ہم

منتیں بار بار کرنے کو

اپنی عیاریوں کو دیکھیں آپ

اور مرے اعتبار کرنے کو

دل بھی تیرا سا چاہیئے ہے نظامؔ

عشق کے اختیار کرنے کو

dekh apne qarar karne ko

aur mire intizar karne ko

tumhen dekhe se kya tasalli ho

ji to hota hai pyar karne ko

meri tadbir ik nahin karta

hain nasihat hazar karne ko

wo wo sadme sahe shab-e-gham mein

chahiye din shumar karne ko

wo gar aen to pas kya hai aur

ek jan hai nisar karne ko

jhute waade kiya na kije ap

muft umidwar karne ko

ap hain ruthne hi ko aur ham

minnaten bar bar karne ko

apni ayyariyon ko dekhen ap

aur mire etibar karne ko

dil bhi tera sa chahiye hai nizam

ishq ke ikhtiyar karne ko