دیکھ اس کو اک آہ ہم نے کر لی

دیکھ اس کو اک آہ ہم نے کر لی

حسرت سے نگاہ ہم نے کر لی

کیا جانے کوئی کہ گھر میں بیٹھے

اس شوخ سے راہ ہم نے کر لی

بندہ پہ نہ کر کرم زیادہ

بس بس تری چاہ ہم نے کر لی

جب اس نے چلائی تیغ ہم پر

ہاتھوں کی پناہ ہم نے کر لی

نخوت سے جو کوئی پیش آیا

کج اپنی کلاہ ہم نے کر لی

زلف و رخ مہوشاں کی دولت

سیر شب ماہ ہم نے کر لی

کیا دیر ہے پھر یہ ابر رحمت

تختی تو سیاہ ہم نے کر لی

دی ضبط میں جب کہ مصحفیؔ جاں

شرم اس کی گواہ ہم نے کر لی

dekh us ko ik ah ham ne kar li

hasrat se nigah ham ne kar li

kya jane koi ke ghar mein baithe

us shokh se rah ham ne kar li

banda pe na kar karam ziyada

bas bas tiri chah ham ne kar li

jab us ne chillai tegh ham par

hathon ki panah ham ne kar li

nakhwat se jo koi pesh aya

kaj apni kulah ham ne kar li

zulf-o-rukh mahwashan ki daulat

sair-e-shab mah ham ne kar li

kya der hai phir ye abr-e-rahmat

takhti to siyah ham ne kar li

di zabt mein jab ke mushafi jan

sharm us ki gawah ham ne kar li