دیوانگی نے کیا کیا عالم دکھا دیے ہیں

پریوں نے کھڑکیوں کے پردے اٹھا دیے ہیں

اللہ رے فروغ اس رخسار آتشیں کا

شمعوں کے رنگ مثل کافور اڑا دیے ہیں

آتش نفس ہوا ہے گل زار کی ہمارے

بجلی گری ہے غنچے جب مسکرا دیے ہیں

سو بار گل کو اس نے تلووں تلے ملا ہے

کٹوا کے سرو شمشاد اکثر جلا دیے ہیں

انسان خوبرو سے باقی رہے تفاوت

اس واسطے پری کو دو پر لگا دیے ہیں

ابروئے کج سے خون عشاق کیا عجب ہے

تلوار نے نشان لشکر مٹا دیے ہیں

کس کس کو خوب کہئے اللہ نے بتوں کو

کیا گوش و چشم کیا لب کیا دست و پا دیے ہیں

بے یار بام پر جو وحشت میں چڑھ گیا ہوں

پرنالے روتے روتے میں نے بہا دیے ہیں

وصف کمان ابرو جو کیجیے سو کم ہے

بے تیر بسملوں کے تودے لگا دیے ہیں

رویا ہوں یاد کر کے میں تیری تند خوئی

صرصر نے جب چراغ روشن بجھا دیے ہیں

سوز دل و جگر کی شدت پھر آج کل ہے

پھر پہلوؤں کے تکیے مشعل بنا دیے ہیں

شمعوں کو تو نے دل سے پروانوں کے اتارا

آنکھوں سے بلبلوں کی گلشن گرا دیے ہیں

وہ بادہ کش ہوں میری آواز پا کو سن کر

شیشوں نے سر حضور ساغر جھکا دیے ہیں

اشکوں سے خانۂ تن آتشؔ خراب ہوگا

قصر سپہر رفعت باراں نے ڈھا دیے ہیں

pariyon ne khirkiyon ke parde utha diye hain

allah re farogh is rukhsar atishin ka

shamon ke rang misl-e-kafur ura diye hain

atish nafas hua hai gul zar ki hamare

bijli giri hai ghunche jab muskura diye hain

sau bar-e-gul ko us ne talwon tale mila hai

katwa ke sarw shamshad aksar jala diye hain

insan khubru se baqi rahe tafawut

is waste pari ko do par laga diye hain

abru-e-kaj se khun-e-ushshaq kya ajab hai

talwar ne nishan-e-lashkar mita diye hain

kis kis ko khub kahiye allah ne buton ko

kya gosh-o-chashm kya lab kya dast-o-pa diye hain

be yar bam par jo wahshat mein charh gaya hun

parnale rote rote main ne baha diye hain

wasf-e-kaman-e-abru jo kijiye so kam hai

be tir bismilon ke taude laga diye hain

roya hun yad kar ke main teri tund khui

sarsar ne jab charagh-e-raushan bujha diye hain

soz-e-dil-o-jigar ki shiddat phir aj kal hai

phir pahluon ke takiye mashal bana diye hain

shamon ko tu ne dil se parwanon ke utara

ankhon se bulbulon ki gulshan gira diye hain

wo bada kash hun meri awaz-e-pa ko sun kar

shishon ne sar huzur-e-saghar jhuka diye hain

ashkon se khana-e-tan atish kharab hoga

qasr-e-sipehr rifat baran ne dha diye hain