برگشتہ طالعی کا تماشا دکھاؤں میں

برگشتہ طالعی کا تماشا دکھاؤں میں

گھر کو لگے جو آگ تو پانی بجھاؤں میں

جنس گراں بہا کا خریدار کون ہے

یکتا نہیں الٰہی جو چوری ہی جاؤں میں

لالہ رخوں کے حسن کا بھوکا ہوں اس قدر

دل ہو نہ سیر لاکھ اگر داغ کھاؤں میں

آنکھیں مری کرے جو منور جمال یار

گھی کے چراغ طور کے اوپر جلاؤں میں

مردے کی طرح سوتے ہیں کیسے مرے نصیب

ٹھوکر سے پائے یار کے ان کو جگاؤں میں

بوسہ ملے کماں کا جو ابروئے یار کی

محراب بیت کعبہ میں چلا چڑھاؤں میں

جی چاہتا ہے شوق شہادت میں قبل مرگ

بنوا کے قبر لالہ کو اس پر لگاؤں میں

گھر میں جو مجھ فقیر کے وہ شاہ حسن آئے

مژگاں کے بوریے جو کھڑے ہیں بچھاؤں میں

کانٹا سکھا کے ہجر نے ہر چند کر دیا

وہ گل بدن ملے تو نہ پھولا سماؤں میں

تم تو غریب خانہ میں آئے نہ ایک روز

فرمائیے تو شب کو کسی وقت آؤں میں

باریک بیں ہوں شاعر نازک خیال ہوں

مضموں جہاں کمر کا ملے باندھ لاؤں میں

آتشؔ غلام ساقی کوثر ہوں چاہئے

فردوس کا کھلا ہوا دروازہ پاؤں میں

bargashta talii ka tamasha dikhaun main

ghar ko lage jo ag to pani bujhaun mein

jins-e-giran baha ka kharidar kaun hai

yakta nahin ilahi jo chori hi jaun main

lala rukhon ke husn ka bhuka hun is qadar

dil ho na sair lakh agar dagh khaon main

ankhen miri kare jo munawwar jamal-e-yar

ghi ke charagh-e-tur ke upar jalaun mein

murde ki tarah sote hain kaise mire nasib

thokar se pae yar ke un ko jagaun mein

bosa mile kaman ka jo abru-e-yar ki

mehrab-e-bit kaaba mein chala charhaon mein

ji chahta hai shauq-e-shahadat mein qabl-e-marg

banwa ke qabr lala ko us par lagaun mein

ghar mein jo mujh faqir ke wo shah-e-husn ae

mizhgan ke borye jo khare hain bichhaun mein

kanta sikha ke hijr ne har chand kar diya

wo gul badan mile to na phula samaon mein

tum to gharib khana mein ae na ek roz

farmaiye to shab ko kisi waqt aun main

barik bin hun shayar-e-nazuk khayal hun

mazmun jahan kamar ka mile bandh laon main

atish ghulam-e-saqi-e-kausar hun chahiye

firdaus ka khula hua darwaza paon mein