بادۂ خم خانۂ توحید کا مے نوش ہوں

بادۂ خم خانۂ توحید کا مے نوش ہوں

چور ہوں مستی میں ایسا بے خود و مدہوش ہوں

گرد پھرنے دے مجھے ساقی یہ میرا فرض ہے

مثل ساغر دور میں ہوں بادۂ سرجوش ہوں

طرز خاموشی مری بتلاتی ہے اس راز کو

ہوں نوا سنج حقیقت لاکھ میں خاموش ہوں

دردمند عشق ہو کر ضبط کا خوگر ہوں میں

صورت سیماب ہو کر پیکر خاموش ہوں

کس کی فرقت وصل کس کا اور ہے معشوق کون

شادؔ میں اس عالم تکویں کا ہم آغوش ہوں

bada-e-kham khana-e-tauhid ka mai nosh hun

chur hun masti mein aisa be khud-o-madhosh hun

gard phirne de mujhe saqi ye mera farz hai

misl-e-saghar daur mein hun bada-e-sarjosh hun

tarz-e-khamoshi miri batlati hai is raz ko

hun nawa sanj-e-haqiqat lakh mein khamosh hun

dardmand ishq ho kar zabt ka khugar hun main

surat-e-simab ho kar paikar-e-khamosh hun

kis ki furqat wasl kis ka aur hai maashuq kaun

shad mein is alam-e-takwin ka ham aghosh hun