باغ میں جگنو چمکتے ہیں جو پیارے رات کو

باغ میں جگنو چمکتے ہیں جو پیارے رات کو

یاد آتے ہیں ان آنکھوں کے اشارے رات کو

شبہ ہے تم کو کہاں ٹوٹے ہیں تارے رات کو

دم بہ دم آنسو ٹپکتے تھے ہمارے رات کو

ٹوٹے تارے سیکڑوں یوں قدسیوں کے دل ہلے

درد سے جس وقت ہم تم کو پکارے رات کو

پوری گردش آسماں نے شام سے کی تا سحر

آج میں نے گن لیے سارے ستارے رات کو

دھوپ نکلی دن کو چہرے سے ہٹا لی جب نقاب

چاندنی پھیلی جہاں کپڑے اتارے رات کو

صاف کروٹ لینے کی آواز آئی کان میں

سوئے دل جب جھک کے ہم تم کو پکارے رات کو

ذروں کو شاباش دن کو ہیں حضور مہر رخ

دیکھیے چھپ کے نکلتے ہیں ستارے رات کو

ہجر کی مدت نہ ہوگی ختم ثابت ہو چکا

دن کو ذرے گن چکا میں اور تارے رات کو

الفت رخ میں ہے وحشت یاد گیسو میں بکا

دن کو صحرا میں ہیں دریا کے کنارے رات کو

آ گئی صبح قیامت اور میں سویا نہیں

پھر نہ آئی نیند تم جب سے سدھارے رات کو

دل جگر لینے پھر آئے صبح کو کہتے ہوئے

رہ گئے بستر پہ دو موتی ہمارے رات کو

منہ پہ زلف زر فشاں ہے مجھ سے ہے رونے کا حکم

چاندنی دیکھی ہے دریا کے کنارے رات کو

آپ آرائش بھی کرتے ہیں موافق وقت کے

دن کو منہ دھویا گیا گیسو سنوارے رات کو

ڈھونڈھتے پھرتے ہیں دل کو صبح سے ہر سو رشیدؔ

دل ربا تھا ایک پہلو میں ہمارے رات کو

bagh mein jugnu chamakte hain jo pyare rat ko

yad ate hain in ankhon ke ishare rat ko

shuba hai tum ko kahan tute hain tare rat ko

dam ba dam ansu tapakte the hamare rat ko

tute tare saikron yun qudsiyon ke dil hile

dard se jis waqt ham tum ko pukare rat ko

puri gardish asman ne sham se ki ta sahar

aj main ne gin liye sare sitare rat ko

dhup nikli din ko chehre se hata li jab naqab

chandni phaili jahan kapre utare rat ko

saf karwat lene ki awaz ai kan mein

su-e-dil jab jhuk ke ham tum ko pukare rat ko

zarron ko shabash din ko hain huzur-e-mehr rukh

dekhiye chhup ke nikalte hain sitare rat ko

hijr ki muddat na hogi khatm sabit ho chuka

din ko zarre gin chuka mein aur tare rat ko

ulfat-e-rukh mein hai wahshat yad-e-gesu mein buka

din ko sahra mein hain dariya ke kinare rat ko

a gai subh-e-qayamat aur main soya nahin

phir na ai nind tum jab se sidhare rat ko

dil jigar lene phir ae subh ko kahte hue

rah gae bistar pe do moti hamare rat ko

munh pe zulf-e-zar fishan hai mujh se hai rone ka hukm

chandni dekhi hai dariya ke kinare rat ko

ap araish bhi karte hain muafiq waqt ke

din ko munh dhoya gaya gesu sanware rat ko

dhundhte phirte hain dil ko subh se har su rashid

dil ruba tha ek pahlu mein hamare rat ko