باغ میں پھولوں کو روند آئی سواری آپ کی

باغ میں پھولوں کو روند آئی سواری آپ کی

کس قدر ممنون ہے باد بہاری آپ کی

بے وفائی آپ کی غفلت شعاری آپ کی

میرے دل نے عادتیں سیکھی ہیں ساری آپ کی

ہے یقیں باہم گلے ملنے کو اٹھیں دست شوق

ہو اگر تصویر بھی یکجا ہماری آپ کی

میکدے میں ٹوٹے جاتے ہیں بہم لڑ لڑ کے جام

مفسدہ پرداز ہے چشم خماری آپ کی

جذب اسے کہتے ہیں آئے کہنے میری قبر تک

اب یہاں سے بڑھ نہیں سکتی سواری آپ کی

کرتی ہیں اندھیر ہاتھوں کی یہ کالی میلیاں

قاتل عالم ہوئی ہے سوگواری آپ کی

جا بجا ہوتے ہیں دامن گیر دل عشاق کے

ہر قدم پر آج رکتی ہے سواری آپ کی

یاد ایامے کہ تھا زوروں پہ جذب حسن و عشق

وہ مرے دل کا تڑپنا بے قراری آپ کی

ہے شب مہتاب گورے رنگ سے کپڑے سیاہ

حسن کو چمکا رہی ہے سوگواری آپ کی

دو طرح کے ایک ساغر میں لبالب ہے شراب

خواب آلودہ نہیں چشم خماری آپ کی

میرے لاشے کو لیے پھرتے ہیں ان راہوں میں لوگ

جن گلی کوچوں میں پھرتی تھی سواری آپ کی

آج کس پر رحم آیا کس کو روئے ہیں حضور

ہے نصیب دشمناں آواز بھاری آپ کی

عہد میں مجنوں کے لیلیٰ کا رہا کیا دور دور

اب تعشقؔ کے زمانے میں ہے باری آپ کی

bagh mein phulon ko raund ai sawari ap ki

kis qadar mamnun hai bad-e-bahari ap ki

be wafai ap ki ghaflat shiari ap ki

mere dil ne adaten sikhi hain sari ap ki

hai yaqin baham gale milne ko uthen dast-e-shauq

ho agar taswir bhi yakja hamari ap ki

maikade mein tute jate hain baham lar lar ke jam

mafsada pardaz hai chashm-e-khumari ap ki

jazb use kahte hain ae kahne meri qabr tak

ab yahan se barh nahin sakti sawari ap ki

karti hain andher hathon ki ye kali mailiyan

qatil-e-alam hui hai sogwari ap ki

ja baja hote hain daman gir dil ushshaq ke

har qadam par aj rukti hai sawari ap ki

yad-e-iumme ke tha zoron pe jazb-e-husn-o-ishq

wo mire dil ka tarapna be qarari ap ki

hai shab-e-mahtab gore rang se kapre siyah

husn ko chamka rahi hai sogwari ap ki

do tarah ke ek saghar mein labalab hai sharab

khwab aluda nahin chashm-e-khumari ap ki

mere lashe ko liye phirte hain in rahon mein log

jin gali kuchon mein phirti thi sawari ap ki

aj kis par rahm aya kis ko roe hain huzur

hai nasib-e-dushmanan awaz bhari ap ki

ahd mein majnun ke laila ka raha kya dur dur

ab taashshuq ke zamane mein hai bari ap ki