دیکھا ادھر کسی نے ادھر میں نے آہ کی

دیکھا ادھر کسی نے ادھر میں نے آہ کی

تڑپا رہی ہے قلب کو بجلی نگاہ کی

بن آئے پھر تو حشر میں ہر عذر خواہ کی

دو اپنے ہاتھ سے جو سزا تم گناہ کی

اب میں یوں ہی لحد میں بھی بدلوں گا کروٹیں

میرا تو دم نکلتا تھا کیوں تم نے آہ کی

سمجھے نہ بچپنے سے کہ کس پر پڑے گا تیر

آئینہ دیکھنے میں بھی ترچھی نگاہ کی

اک اور بھی رفیق مرا چھوٹنے کو ہے

ہاتھوں سے دل پکڑ لیا جب میں نے آہ کی

وہ اور رخ پہ زلف کو بکھرائے آئے ہیں

تقدیر دیکھیے مرے روز سیاہ کی

میں مر گیا تھا خندۂ زخم جگر سے بھی

ظالم ہنسی میں جان گئی بے گناہ کی

کچھ آپ کا گلہ تھا نہ شکوہ عدو کا تھا

شرما کے کیوں حضور نے نیچی نگاہ کی

آنکھوں ہی میں رہے گا یہ صفدرؔ کا خون ہے

تم آئنے میں دیکھو تو سرخی نگاہ کی

dekha idhar kisi ne idhar main ne ah ki

tarpa rahi hai qalb ko bijli nigah ki

ban ae phir to hashr mein har uzr khwah ki

do apne hath se jo saza tum gunah ki

ab main yun hi lahad mein bhi badlunga karwaten

mera to dam nikalta tha kyun tum ne ah ki

samjhe na bachpane se ke kis par parega tir

aina dekhne mein bhi tirchhi nigah ki

ik aur bhi rafiq mira chhutne ko hai

hathon se dil pakar liya jab main ne ah ki

wo aur rukh pe zulf ko bikhrae ae hain

taqdir dekhiye mire roz-e-siyah ki

main mar gaya tha khanda-e-zakhm-e-jigar se bhi

zalim hansi mein jan gai be gunah ki

kuchh ap ka gila tha na shikwa adu ka tha

sharma ke kyun huzur ne nichi nigah ki

ankhon hi mein rahega ye safdar ka khun hai

tum aine mein dekho to surkhi nigah ki