دیکھا کبھو نہ اس دل ناشاد کی طرف

دیکھا کبھو نہ اس دل ناشاد کی طرف

کرتا رہا تو اپنی ہی بیداد کی طرف

جس گل نے سن کے نالۂ بلبل اڑا دیا

رکھتا ہے گوش کب مری فریاد کی طرف

موند اے پر شکستہ نہ چاک قفس کہ ہم

ٹک یاں کو دیکھ لیتے ہیں صیاد کی طرف

کہتے ہیں گریہ خانۂ دل کر چکا خراب

آتا ہے چشم اب تری بنیاد کی طرف

خسرو سے کچھ بگاڑ ہے شیریں کو ظاہرا

پیغام پھیر جاتے ہیں فرہاد کی طرف

لیجو خبر مرے بھی دل زار کی نسیم

جاوے اگر تو اس ستم آباد کی طرف

قائمؔ تو اس غزل کو یوں ہی سرسری ہی کہہ

ہونا پڑے گا حضرت استاد کی طرف

dekha kabhu na is dil-e-nashad ki taraf

karta raha to apni hi bedad ki taraf

jis gul ne sun ke nala-e-bulbul ura diya

rakhta hai gosh kab miri fariyad ki taraf

mund ai par shikasta na chak-e-qafas ke ham

tuk yan ko dekh lete hain sayyad ki taraf

kahte hain girya khana-e-dil kar chuka kharab

ata hai chashm ab tiri buniyad ki taraf

khusrau se kuchh bigar hai shirin ko zahiran

paigham pher jate hain farhad ki taraf

lijo khabar mire bhi dil-e-zar ki nasim

jawe agar to us sitam abad ki taraf

qaim to is ghazal ko yun hi sarsari hi kah

hona parega hazrat-e-ustad ki taraf