دیکھو تو میرے نالہ و آہ و فغاں کی اور

دیکھو تو میرے نالہ و آہ و فغاں کی اور

بان اس کڑک سے جاوے ہے کب آسماں کی اور

مسجد کو چھوڑ آئے کلیسائیاں کی اور

چھوڑا نواح کعبہ چلے ہم بتاں کی اور

زاہد ترے کمال پہ ماریں ہیں پشت پا

لائے فرو سر اپنا جو پیر مغاں کی اور

سکھ نیند بے خودی کی اسے ترت آ گئی

لاگا جو گوش ٹک بھی مری داستاں کی اور

ٹکڑے جگر کے بہہ چلے ہمراہ سیل اشک

لاتا ہے کھینچ خار و خس آب رواں کی اور

ظالم سلاح باندھ کے آنا بہ قصد قتل

کیا ہے ضرور، اپنے کسی نیم جاں کی اور

کچھ کم نہیں تری نگہ و ابرو و مژہ

مت ہاتھ لا تو خنجر و تیغ و سناں کی اور

تیری نگاہ مہر نے مجھ سے وہ کچھ کیا

جو کچھ کہ چشم ماہ کرے ہے کتاں کی اور

ان انکھڑیوں کی پتلیوں سے آنکھ جا لگی

جا پھرتی نئیں نگاہ اب ان ابرواں کی اور

مصرع یہ اپنا آیا جہاں دارؔ ہم کو یاد

چھوڑا نواح کعبہ چلے ہم بتاں کی اور

dekho to mere nala-o-ah-o-fughan ki aur

ban is karak se jawe hai kab asman ki aur

masjid ko chhor ae kalisaiyan ki aur

chhora nawah kaaba chale ham butan ki aur

zahid tire kamal pe maren hain pusht-e-pa

lae faro sar apna jo pir-e-mughan ki aur

sukh nind be khudi ki use turat a gai

laga jo gosh tuk bhi miri dastan ki aur

tukre jigar ke bah chale hamrah sail-e-ashk

lata hai khinch khar-o-khas ab-e-rawan ki aur

zalim silah bandh ke ana ba qasd-e-qatl

kya hai zarur, apne kisi nim jan ki aur

kuchh kam nahin tiri nigah-o-abru-o-mizha

mat hath la to khanjar-o-tegh-o-sinan ki aur

teri nigah-e-mehr ne mujh se wo kuchh kiya

jo kuchh ke chashm-e-mah kare hai katan ki aur

in ankhriyon ki putliyon se ankh ja lagi

ja phirti nain nigah ab un abrwan ki aur

misra ye apna aya jahan dar ham ko yad

chhora nawah kaaba chale ham butan ki aur