دیکھا کسی کا ہم نے نہ ایسا سنا دماغ

دیکھا کسی کا ہم نے نہ ایسا سنا دماغ

ان سنگ دل بتوں کا ہے اللہ کیا دماغ

کرتا نہیں تمیز شریف و رذیل میں

اس چرخ پیر کا ہے مگر پھر گیا دماغ

دیکھے بہت ہیں ہم نے حسینان پر غرور

لیکن عجب طرح کا ہے کچھ آپ کا دماغ

کل جتنا ہم نے اس کو منا کے بنایا تھا

اتنا ہی آج اور ہے بگڑا ہوا دماغ

جب ہوں گے پیش داور محشر کے سامنے

ہم دیکھ لیں گے آپ کا روز جزا دماغ

آیا نہیں سمجھ میں یہ الٹا معاملہ

بن بن کے کیوں بگڑتا ہے یہ آپ کا دماغ

گل کی بہار گلستاں میں چند روز ہے

اچھا نہیں ہے اس قدر اے مہ لقا دماغ

اے مشرقیؔ کبھی تھا دماغ اپنا عرش پر

ہے آج کل تو خاک میں اپنا ملا دماغ

dekha kisi ka ham ne na aisa suna dimagh

un sang dil buton ka hai allah kiya dimagh

karta nahin tamiz sharif-o-razil mein

is charkh-e-pir ka hai magar phir gaya dimagh

dekhe bahut hain ham ne hasinan par ghurur

lekin ajab tarah ka hai kuchh ap ka dimagh

kal jitna ham ne us ko mana ke banaya tha

itna hi aj aur hai bigra hua dimagh

jab honge pesh-e-dawar-e-mahshar ke samne

ham dekh lenge ap ka roz-e-jaza dimagh

aya nahin samajh mein ye ulta muamla

ban ban ke kyun bigarta hai ye ap ka dimagh

gul ki bahar-e-gulsitan mein chand roz hai

achchha nahin hai is qadar ai mah liqa dimagh

ai mashriqi kabhi tha dimagh apna arsh par

hai aj kal to khak mein apna mila dimagh