دیکھی جو زلف یار طبیعت سنبھل گئی

دیکھی جو زلف یار طبیعت سنبھل گئی

آئی ہوئی بلا مرے سر پر سے ٹل گئی

پوچھا اگر کسی نے مرا آ کے حال دل

بے اختیار آہ لبوں سے نکل گئی

عریاں حرارت تپ فرقت سے میں رہا

ہر بار میرے جسم کی پوشاک جل گئی

کیفیت بہار جو یاد آئی زیر خاک

داغ جنوں سے اپنی طبیعت بہل گئی

اس کے دہان تنگ کی تنگی نہ پوچھئے

اعجاز سمجھے بات جو منہ سے نکل گئی

فرقت میں ہم بغل جو ہوا برقؔ گور سے

حسرت وصال یار کی دل سے نکل گئی

dekhi jo zulf-e-yar tabiat sambhal gai

ai hui bala mire sar par se tal gai

puchha agar kisi ne mira a ke hal-e-dil

be ikhtiyar ah labon se nikal gai

uryan hararat tap-e-furqat se main raha

har bar mere jism ki poshak jal gai

kaifiyat-e-bahar jo yad ai zer-e-khak

dagh-e-junun se apni tabiat bahal gai

us ke dahan-e-tang ki tangi na puchhiye

ejaz samjhe bat jo munh se nikal gai

furqat mein ham baghal jo hua barq gor se

hasrat wisal-e-yar ki dil se nikal gai