آرزو دل میں بنائے ہوئے گھر ہے بھی تو کیا — مضطر خیرآبادی (Muztar Khairabadi)

آرزو دل میں بنائے ہوئے گھر ہے بھی تو کیا

اس سے کچھ کام بھی نکلے یہ اگر ہے بھی تو کیا

نہ وہ پوچھے نہ دوا دے نہ وہ دیکھے نہ وہ آئے

درد دل ہے بھی تو کیا درد جگر ہے بھی تو کیا

آپ سے مجھ کو محبت جو نہیں ہے نہ سہی

اور بقول آپ کے ہونے کو اگر ہے بھی تو کیا

دیر ہی کیا ہے حسینوں کی نگاہیں پھرتے

مجھ پہ دو دن کو عنایت کی نظر ہے بھی تو کیا

صبح تک کون جئے گا شب تنہائی میں

دل ناداں تجھے امید سحر ہے بھی تو کیا

میں بدستور جلوں گا یہ نہ ہوگی مضطرؔ

میری ساتھی شب غم شمع سحر ہے بھی تو کیا