دیکھنا ہر صبح تجھ رخسار کا

دیکھنا ہر صبح تجھ رخسار کا

ہے مطالعہ مطلع انوار کا

بلبل و پروانہ کرنا دل کے تئیں

کام ہے تجھ چہرۂ گل نار کا

صبح تیرا درس پایا تھا صنم

شوق دل محتاج ہے تکرار کا

ماہ کے سینے اپر اے شمع رو

داغ ہے تجھ حسن کی جھلکار کا

دل کوں دیتا ہے ہمارے پیچ و تاب

پیچ تیرے طرۂ طرار کا

جو سنیا تیرے دہن سوں یک بچن

بھید پایا نسخۂ اسرار کا

چاہتا ہے اس جہاں میں گر بہشت

جا تماشا دیکھ اس رخسار کا

آرسی کے ہاتھ سوں ڈرتا ہے خط

چور کوں ہے خوف چوکیدار کا

سرکشی آتش مزاجی ہے سبب

ناصحوں کو گرمئ بازار کا

اے ولیؔ کیوں سن سکے ناصح کی بات

جو دوانا ہے پری رخسار کا

dekhna har subh tujh rukhsar ka

hai mutalaa matla-e-anwar ka

bulbul-o-parwana karna dil ke tain

kam hai tujh chehra-e-gul nar ka

subh tera dars paya tha sanam

shauq-e-dil mohtaj hai takrar ka

mah ke sine upar ai shama ro

dagh hai tujh husn ki jhalkar ka

dil kun deta hai hamare pech-o-tab

pech tere turra-e-tarrar ka

jo sunya tere dahan sun yak bachan

bhed paya nuskha-e-asrar ka

chahta hai is jahan mein gar bahisht

ja tamasha dekh is rukhsar ka

arsi ke hath sun darta hai khat

chur kun hai khauf chaukidar ka

sarkashi atish mizaji hai sabab

nasihon ko garmi-e-bazar ka

ai wali kyun sun sake naseh ki bat

jo dawana hai pari rukhsar ka