دو جہاں کو نگہ عجز سے اکثر دیکھا

دو جہاں کو نگہ عجز سے اکثر دیکھا

ہم نے امید کو حرماں کے برابر دیکھا

طالع بے ہنری اوج فلک پر دیکھا

جس جگہ وہم نہ پہونچا تھا وہاں سر دیکھا

اس برے وقت میں بھی لاکھ سے اچھا ہوں میں

میں نے معشوق کے پردہ میں مقدر دیکھا

کیا کہوں قصۂ دلچسپیٔ حال ابتر

دوستوں نے مجھے اغیار سے بڑھ کر دیکھا

اے اجل خوب بتایا وہ قیامت ہوگی

جس کے آغوش میں تو نے دل مضطر دیکھا

بیکس ہائے تمنا نے سلایا ہے مجھے

پھر نہ جاگوں گا اگر خواب میں محشر دیکھا

یار جب پردہ نشیں ہے تو کہاں کا پردہ

پردہ یہ ہے کہ اسے پردہ سے باہر دیکھا

پاؤں پھیلائے ہیں بے جا ہوس دنیا نے

ہم نے دنیا ہی کو لپٹا ہوا بستر دیکھا

اس کھلے ظلم نے سب کھول دیے ہیں پردے

ہم نے دیکھا تجھے سو بار ستم گر دیکھا

ٹپکا پڑتا ہے رگ شوق سے خون حسرت

کیا وفاؔ دست قضا میں کوئی نشتر دیکھا

do jahan ko nigah-e-ijz se aksar dekha

ham ne ummid ko hirman ke barabar dekha

tale-e-be hunari auj-e-falak par dekha

jis jagah wahm na pahuncha tha wahan sar dekha

is bure waqt mein bhi lakh se achchha hun main

main ne maashuq ke parda mein muqaddar dekha

kya kahun qissa-e-dilchaspi-e-hal-e-abtar

doston ne mujhe aghyar se barh kar dekha

ai ajal khub bataya wo qayamat hogi

jis ke aghosh mein tu ne dil-e-muztar dekha

bekas ha-e-tamanna ne sulaya hai mujhe

phir na jagunga agar khwab mein mahshar dekha

yar jab parda nashin hai to kahan ka parda

parda ye hai ke use parda se bahar dekha

paon phailae hain be ja hawas-e-duniya ne

ham ne duniya hi ko lipta hua bistar dekha

is khule zulm ne sab khol diye hain parde

ham ne dekha tujhe sau bar-e-sitam gar dekha

tapka parta hai rag-e-shauq se khun-e-hasrat

kya wafa dast-e-qaza mein koi nashtar dekha