دوئی کا تذکرہ توحید میں پایا نہیں جاتا

دوئی کا تذکرہ توحید میں پایا نہیں جاتا

جہاں میری رسائی ہے مرا سایا نہیں جاتا

مرے ٹوٹے ہوئے پائے طلب کا مجھ پہ احساں ہے

تمہارے در سے اٹھ کر اب کہیں جایا نہیں جاتا

محبت ہو تو جاتی ہے محبت کی نہیں جاتی

یہ شعلہ خود بھڑک اٹھتا ہے بھڑکایا نہیں جاتا

فقیری میں بھی مجھ کو مانگنے سے شرم آتی ہے

سوالی ہو کے مجھ سے ہاتھ پھیلاتا نہیں جاتا

چمن تم سے عبارت ہے بہاریں تم سے زندہ ہیں

تمہارے سامنے پھولوں سے مرجھایا نہیں جاتا

محبت کے لیے کچھ خاص دل مخصوص ہوتے ہیں

یہ وہ نغمہ ہے جو ہر ساز پر گایا نہیں جاتا

محبت اصل میں مخمورؔ وہ راز حقیقت ہے

سمجھ میں آ گیا ہے پھر بھی سمجھایا نہیں جاتا

dui ka tazkira tauhid mein paya nahin jata

jahan meri rasai hai mira saya nahin jata

mire tute hue pae talab ka mujh pe ehsan hai

tumhare dar se uth kar ab kahin jaya nahin jata

mohabbat ho to jati hai mohabbat ki nahin jati

ye shola khud bharak uthta hai bhirkaya nahin jata

faqiri mein bhi mujh ko mangne se sharm ati hai

sawali ho ke mujh se hath phailata nahin jata

chaman tum se ibarat hai baharen tum se zinda hain

tumhare samne phulon se murjhaya nahin jata

mohabbat ke liye kuchh khas dil makhsus hote hain

ye wo naghma hai jo har saz par gaya nahin jata

mohabbat asl mein makhmur wo raz-e-haqiqat hai

samajh mein a gaya hai phir bhi samjhaya nahin jata