دنیا میں قصر و ایواں بے فائدہ بنایا

دنیا میں قصر و ایواں بے فائدہ بنایا

عقبیٰ انہیں بنائی منعم تو کیا بنایا

جو عنصری گھروندا پہ چوکھٹا بنایا

اک دم میں وہ بشر کا بگڑا بنا بنایا

زلفوں میں طائر جاں جس نے پھنسا بنایا

تن کو قفس رگوں کو اک جال سا بنایا

سوز غم و الم سے بہہ جاؤں شمع ساں جو

اے شعلہ رو مجھے بھی کیا موم کا بنایا

نقشے پہ کھنچ سکا جب مانی سے دل جلوں کا

جس جا مکان دل تھا آتش کدہ بنایا

بحر جہاں میں جس دم پہنچی نمود انساں

پانی نے سر اٹھا کے اک بلبلا بنایا

پہنا کفن اتارا ہستی کے پیرہن کو

پھینکا لباس کہنہ جامہ نیا بنایا

خالق نے جب کہا خلق ابرو کے بسملوں کا

گردن مری بنائی خنجر ترا بنایا

چل کر صبا کی صورت خنداں کیا گلوں کو

غنچوں کا منہ بگاڑا جب منہ ذرا بنایا

شیشہ گری پہ نازاں بیکار شیشہ گر ہیں

کوئی بھی دل کسی کا ٹوٹا ہوا بنایا

آہوں کے کودکوں نے چھلنی کیا یہاں تک

سقف فلک کو چھتا زنبور کا بنایا

شان خدا عیاں ہے ہر بت سے میکدے میں

کعبے میں تم نے جا کر اے شادؔ کیا بنایا

duniya mein qasr-o-aiwan be faida banaya

uqba unhen banai munam to kya banaya

jo unsari gharaunda pe chaukhta banaya

ik dam mein wo bashar ka bigra bana banaya

zulfon mein tair-e-jan jis ne phansa banaya

tan ko qafas ragon ko ik jal sa banaya

soz-e-gham-o-alam se bah jaun shama san jo

ai shola ro mujhe bhi kya mom ka banaya

naqshe pe khinch saka jab mani se dil jalon ka

jis ja makan-e-dil tha atish kada banaya

bahr jahan mein jis dam pahunchi numud-e-insan

pani ne sar utha ke ik bulbula banaya

pahna kafan utara hasti ke pairahan ko

phenka libas-e-kohna jama naya banaya

khaliq ne jab kaha khalq-e-abru ke bismilon ka

gardan miri banai khanjar tira banaya

chal kar saba ki surat khandan kiya gulon ko

ghunchon ka munh bigara jab munh zara banaya

shisha giri pe nazan bekar shisha gar hain

koi bhi dil kisi ka tuta hua banaya

ahon ke kaudakon ne chhalni kiya yahan tak

saqaf-e-falak ko chhanta zambur ka banaya

shan-e-khuda ayan hai har but se maikade mein

kaabe mein tum ne ja kar ai shad kya banaya