دنیا میں بقا نہیں کسی کو

دنیا میں بقا نہیں کسی کو

مرنا اک روز ہے سبھی کو

وہ کون ہے جو ہے عیب سے پاک

کیا کوئی برا کہے کسی کو

معلوم ہے وعدے کی حقیقت

بھلا لیتے ہیں اپنے جی کو

خود نور خدا ہو تم میں پیدا

دل سے کھو دو اگر خودی کو

سو عیبوں کا ایک عیب ہے یہ

افلاس خدا نہ دے کسی کو

مشکل نہیں کوئی کام لیکن

ہمت لازم ہے آدمی کو

سچ کہہ دے کہ ہے قصور کس کا

منصف میں نے کیا تجھی کو

مانا کہ شراب چھوڑی کیفیؔ

ایسا تو کہو نہ مے کشی کو

duniya mein baqa nahin kisi ko

marna ik roz hai sabhi ko

wo kaun hai jo hai aib se pak

kya koi bura kahe kisi ko

maalum hai waade ki haqiqat

bhala lete hain apne ji ko

khud nur-e-khuda ho tum mein paida

dil se kho do agar khudi ko

so aibon ka ek aib hai ye

iflas khuda na de kisi ko

mushkil nahin koi kam lekin

himmat lazim hai admi ko

sach kah de ke hai qusur kis ka

munsif main ne kiya tujhi ko

mana ke sharab chhori kaifi

aisa to kaho na mai kashi ko